वागमति प्रदेशय् शैलेन्द्र मुख्यमन्त्री जुइला ?
eBukhan – ईबुखँ रिपाेर्टर, २०८० चैत्र ५, सोमबार वर्गीकृत राजनीति
वागमति प्रदेश सभाय् निगू सिट दुगु हाम्रो नेपाली पार्टीं प्रदेश सरकारया नेतृत्व दावी याःगु द ।
पार्टीं विज्ञप्ती जारी यासें प्रदेशय् न्हूगु सरकार दयेकेत छुं नं दल वा गठबन्धनयात समर्थन मयायेगु धासें सरकारया नेतृत्व दावी याःगु खः ।
पार्टी प्रवक्ता डिल्लीकिशोर कार्कीं जारी यानादीगु विज्ञप्तीइ वंगु चैत्र ३ व ४ गते च्वंगु पार्टीया केन्द्रीय कमिटी मुँज्यां प्रदेश सरकार सम्वन्धय् छुं नं दल वा गठबन्धनया पक्ष वा विपक्षय् मवंसे जनताया पक्षय् वनेगु धयातःगु दु ।
‘लोकतान्त्रिक पद्धति व जनताया विश्वासयात कायम तयातयेत बागमति प्रदेश सरकारया नेतृत्व यायेगु लागिं हाम्रो नेपाली पार्टी तयार दुगु खँ दक्वं राजनैतीक दल अले जनतायात इनाप यानाच्वना’ विज्ञप्तीइ च्वयातःगु दु ।
बागमति प्रदेशय् नं सत्ता दयेकेगु व टिके यायेगु आज्जुं थीथी मन्त्रालय व राजनीतिक पदया भागबण्डाया भुइ तयाः न्ह्यच्याकाच्वंगु व अज्याःगु हे प्रस्ताव हाम्रो नेपाली पार्टीयात नं वःगु विज्ञप्तीइ धयातःगु दु ।
‘नो नट अगेन धाःपिन्त हे ब्वहलय् तयाः मेगु अज्याःगु हे प्रवृत्तियात बागमति प्रदेश सरकारया छ्यनय् तयेत जिमिसं झीगु ब्वह छ्ययेके बी मखु’ विज्ञप्तीइ च्वयातःगु दु ।
ज्या यायेत सत्ताय् हे वनेमाःगु अपुर्ण भाष्य स्थापित यानाः सत्ताया सवाः कयाच्वंपिनिगु दथुइ पार्टीं यायेमाःगु ज्या सत्ता बाहेक मेथाय् नं यक्व हे दुगु खँ स्थापित याकेगु दावी नेपाली पार्टीं याःगु दु ।
‘लोकतान्त्रिक व न्हूगु चरित्रया रुपं जिमित नेतृत्व बियाः सुशासन व पारदर्शीतालिसेंया न्हूगु लँय् न्ह्याःवनेत स्वयेगु खःसा जिपिं दक्वं पार्टीलिसे सहकार्य यानाः प्रदेश सरकारया नेतृत्वदायी भूमिका म्हितेत सक्षम दु । थुकी जिपिं लिचिलेमखु’ विज्ञप्तीइ च्वयातःगु दु ।
थ्व विज्ञप्ती जारी जूगुलिसें बागमति प्रदेश सरकारय् हाम्रो नेपाली पार्टीं नं मुख्यमन्त्री पद हे दावी याःगु स्पष्ट जूगु दु ।
बागमति प्रदेशय् हाम्रो नेपाली पार्टीया प्रत्यक्ष निर्वाचित छम्ह व समानुपातिकं छम्ह यानाः निम्ह सांसद दु ।
बागमति प्रदेश सभाय् ११० सभासद् छन् । थन सत्ता गठबन्धन दल नेकपा (एमाले) या २७, माओवादी केन्द्रया २१ व नेकपा (एस) या ७ सिट यानाः मुक्कं ५५ सिट दु ।
तर सरकारया नेतृत्वया नितिं ५६ सांसदया समर्थन माः ।
राप्रपां बागमति प्रदेश सभाय् स्वइतं नं समर्थन मयायेगु धायेधुंकूगु दुसा नेमकिपां प्रतिपक्षय् च्वनेगु धाःगु दु ।
थज्याःगु अवस्थाय् हाम्रो नेपाली पार्टीया निर्णयं सरकार गठनया खँय् महत्वपूर्ण भूमिका म्हितीगु पक्का जूगु दु ।
तर, हाम्रो नेपाली पार्टीं छुं नं दल वा गठबन्धनयात समर्थन मयायेगु धासें नेतृत्व हे दावी याःबलय् धाःसा तःधंगु दलतयत कपाः स्याःगु खँ जूगु दु ।
हाम्रो नेपाली पार्टीं बागमति प्रदेश सरकारया नेतृत्वय् दावी याःगु खण्डय् पार्टीया संसदीय दलया नेता शैलेन्द्र बज्राचार्यं मुख्यमन्त्री पदय् उम्मेदवारी बी ।
बज्राचार्य वंगु संसदीय निर्वाचनय् येँ क्षेत्र नम्बर ८ (क) पाखें प्रत्यक्ष निर्वाचित जूगु खः ।
