स्थापनाया १५ दँ लिपा आदिवासी जनजाति चलचित्र महासंघं थःगु स्थापना दिवस हंगु दु ।

आइतबाः येँया चाबहिलस्थित चलचित्र विकास बोर्डय् छगू समारोह यासें महासंघं थःगु स्थापना दिवस हंगु खः ।

स्थापना दिवस समारोहय् महासंघया संस्थापक लिसें महासंघय् आवद्ध थीथी समुदायया संकिपाकःमि संघसंस्थायात सम्मान याःगु खः ।

ज्याझ्वलय् न्ववासें महासंघया नायः पुर्खाजित राईं संस्थायात जन्म ब्यूपिनिगु योगदानयात लुमंका तयेत स्थापना दिवस हनागु धयादिल ।

‘संस्थाय् आवद्ध जुइधुंकाः उकिया जन्मदातायात नं म्हसीका तयेमाः । संस्थाया न्हूगु पुस्तां न्ह्यलुवातयत म्हसियाच्वनेमा, संस्थाया इतिहास, दुःखया बारे सियाच्वनेमा धकाः थ्व स्थापना दिवस हनाच्वनागु दु’ नायः राईया धापू खः ।

व झ्वलय् राईं महासंघया भवन दयेकेगु, सहयोग कोष, अभिलेखालय दयेकेगुलिसेंया योजना नं न्यंकादिल ।

अथेहे, महासंघया पुर्व नायः लिसें संस्थापक मू छ्यान्जे प्रतिमाया पुनं आदिवासी जनजाति संकिपा ख्यः व संकिपाकःमिया उत्थान, हक, अधिकार प्राप्तिया लागि महासंघया स्थापना जूगु लुमंकादिल ।

‘महासंघया १५क्वःगु स्थापना दिवस हनाच्वनागु थ्व इलय् झीसं छुं प्राप्त यायेधुन, यक्व हे प्राप्त यायेमानि । थुकिया लागिं झी अझं संघर्षय् दनि । राज्य तहतक झीगु सः थ्यंकेत झी छधी जुयाः न्ह्याःवनेमाः’ पुनं धयादिल ।

अथेहे, चलचित्र विकास बोर्ड अन्तर्गतया आदिवासी जनजाति मातृभाषी चलचित्र प्रवर्ध्दन समितिया कजि ज्योति राज राईं आदिवासी जनजाति संकिपायात राज्यं अझं नं हेयया मिखां स्वयेगु याःगु धासें दक्वं आदिवासी जनजाति संकिपाकःमित छधी जुयाः संघर्ष यायेमाःगु बिचाः तयादिल ।

ज्याझ्वलय् महासंघया संस्थापक व महासंघय् आवद्ध थीथी आदिवासी जनजाति संकिपाकःमि संंस्थाया संस्थापकतयसं थःथःगु बिचाः तःगु खः ।

स्थापना दिवस समारोहस कलाकारतयगु सांस्कृतिक न्ह्यब्वयालिसें थीथी जनजाति समुदायया तिसालिसेंया संस्कृतिया बारे जानकारीमूलक प्रस्तुतितकं न्ह्यब्वःगु दुगु खः ।

महासंघय् थाैंकन्हय् संस्थापक खुगूलिसें थीथी आदिवासी जनजाति समुदायपाखें १४ संकिपाकःमि संस्थात आवद्ध दु ।

महासंघय् नेवाः फिल्म सोसाइटीं नेवाः संकिपा ख्यःया प्रतिनिधित्व यानाच्वंगु दु ।

वि.सं. २०६६ सालय् किरात राई चलचित्रकर्मी संघया दिपेन राईया नेतृत्वय् महासंघया सुरुवात जूगु खः ।

राई धुंकाः मगर चलचित्रकर्मी संघया प्रतिमाया पुनं छगू कार्यकाल व सुनुवार कलाकार तथा चलचित्रकर्मी संघया अमृत सुनुवारं निगू कार्यकाल महासंघया नेतृत्व यायेधुंकूगु दु ।

आः किरात राई चलचित्रकर्मी संघया हे पुर्खाजित राई महासंघया वर्तमान नायः खः ।