मनराजायात छिन्नलता म्ये सिरपाः
eBukhan – ईबुखँ डेस्क, २०८१ बैशाख १३, बिहिबार वर्गीकृत मनोरञ्जन
नांजाःम्ह संगीतकार लिसें तबला बादक मनराजा नकःमियात छिन्नलता म्ये सिरपाः २०७९ बीगु जूगु दु ।
छिन्नलता म्ये सिरपाः गुथिया साधारण सभां २०७९ सालया नितिं छिन्नलता म्ये सिरपाः संगीतपाखे संगीतकार नकःमियात बीगु निर्णय याःगु खः ।
लिसें उगु हे साधारण सभां म्ये रचनापाखे भूषण खरेल व गायनय् शिव परियारयात सिरपाः बीगु निर्णय नं याःगु दु ।
२०७९ सालया लोकप्रिय युवा प्रतिभा सिरपाः परेलीमा बसुँ कि कलेजीमा बसुँ म्येया लागिं मेनुका पौडेलयात बीगु निर्णय गुथिं याःगु दु ।
गुथिया कथं विक्रम संवत् २०८० या छिन्नलता म्ये सिरपाः म्ये रचनापाखे वीरेन्द्र पाठक, संगीतपाखे चण्डी काफ्ले व गायनय् मनिला सोताङयात बीत्यंगु दु ।
लोकप्रिय युवा प्रतिभा सिरपाः ‘पिरैपिरः झट्ट हेर्दा हजुर जिन्दगी दामी छ’ म्येया नितिं भुपु पाण्डेयात बीगु जूगु दु ।
वि.सं. २०७९ निसें छिन्नलता म्ये सिरपाःया राशि थकयाः छगू लख तका कायम जूगु जानकारी नं गुथिं ब्यूगु दु ।
छिन्नलता युवा प्रतिभा सिरपाःया राशी धाःसा ५०द्वः तका दु ।
गुथिया संस्थापक लिसें गीतकार स्व रमोलादेवी शाह ‘छिन्नलता’या बुदिं वइगु श्रावण २ गते हरिशयनी एकादशी कुन्हु छगू समारोह यासें सिरपाः लःल्हायेगु गुथिं धाःगु दु ।
