येँया थँबहि भगवानबहाःया श्री गरुड भगवान धाइम्ह चकंद्यःया जात्रा थौंनिसें न्ह्यायेत्यंगु दु ।

सिंहसार्थबाहु नं धयातःम्ह चकंद्यःया जात्राया झ्वलय् थौं द्यःयात थँबहिया विक्रमशील महाविहार, भगवानबहालया गर्भगृहं हयाः तुंचुकस्थित दबुलिइ विराजमान याकेगु ज्याझ्वः दु ।

श्री सिँहसार्थबाहु भगवान गुठी तहबिल ज्याकूयात कथं थौं तुंचुकया दबुलिइ विराजमान याकीम्ह द्यःयात कन्हय् न्हिनय् ४ताः इलय् पुर्वपाखेया दबुलिइ विराजमान याकी ।

कन्हय् हे चकंद्यःयात जात्रा यानाः देय् चाःहुइकेगु ज्याझ्वः नं दु । कन्हय् सनिलया ५ताः इलंनिसें चकंद्यःयात देय् चाःहुइकेगु ज्या न्ह्याइ ।

व धुंकाः द्यःयात मूचुकय् विराजमान याकीसा कंस बुधबाः गर्भगृह प्रवेश याकेगु ज्याझ्वः दु ।

परापूर्वकालय् तापालय् व्यापार याःवनीपिं व्यापारीतय् पुचःया नाइकेयात सिंहसार्थबाहु धाइगु खः ।

श्री गरुड भगवान अथवा चकंद्यः नं परापूर्वकालय् तिब्बत व्यापार याःवंगु पुचःया नायः धकाः धाइ ।

व्यापारया झ्वलय् तिब्बत वंगु पुचः लसिंतय् जालय् लाःगु व व उखें सिंहसार्थबाहु याकःचाः जक ज्यान जोगे यानाः नेपाः लिहांवयेत ताःलाःगु किम्वदन्ति श्री गरुड भगवान व थ्व जात्रालिसे स्वानाच्वंगु दु ।

किम्वदन्ति कथं सिंहसार्थबाहुलिसे छम्ह लसिं नं नेपाल पुगेको थ्यंगु व वं हाकनं थः पासापिं थन सःताः थनया मनूत नयेगु याःबलय् सिंहसार्थबाहुं व दक्वं लसिंतय् संहार यानाः लोकया रक्षा याःगु खः ।

व धुंकाः नगरबासीतयसं सिंहसार्थबाहुयात कुबियाः भुइसिन्हलं छ्वाकाः देय् चाःहुइकूगु धाइ । व हे जात्रा थौंतक नं चकंद्यःया जात्राया रुपं निरन्तर न्ह्यानावःगु जनविश्वास दु ।

स्थानीय समाजय् श्रीगरुड भगवान, सिंहसार्थबाहु, चकंद्यःलिसें तानांद्यः धकाः नं म्हस्यूम्ह वयकः द्यः थँबहि पःमाय् कथं विश्वास यानातःगु दु ।

चकंद्यः वा श्री गरुड भगवानयात थँबहि पःमायतय् दिगुद्यः कथं काइ ।

चकंद्यःया नित्य पूजा यायेत विक्रमशील महाविहार न्ह्यःने पलेस्वां पुखुलिइ नीलः कयाहयेमाःगु व उगु हे पुखूया पलेस्वां छानाः पूजा यायेमाःगु परम्परा दुगु धाःगु दु ।

थौंकन्हय् उगु पलेस्वां पुखू धाःसा मदयधुंकल । व हे पलेस्वां पुखूयात न्हंकाः छायाँ सेन्टर दयेकूगु धासें अभियानकर्मीतयसं छायाँ सेन्टर थुनाः पुखू कायम यायेमाःगु सः  थ्वयेकाच्वंगु दु ।

आः थ्व मुद्दा अदालतय् विचाराधीन अवस्थाय् दु ।

लिसें चकंद्यःयात तयेमाःगु पुर्वपाखेया दबू नं थौंकन्हय् व्यक्तिया नामय् वनेधुंकूगु धाःगु दु ।

ऐतिहासिक, धार्मिक, सांस्कृतिक परम्परा, संस्कृतिलिसे स्वानाच्वंगु पुखू व दबू मनूया नामय् वंबलय् संस्कृति, परम्पराया अस्तित्व हे संकटय् लाःगु धासें संस्कृतिप्रेमीत धाःसा चिन्ताय् लानाच्वंगु दु ।