स्वनिगःया यलय् ऐतिहासिक वस्ती ख्वनाया सिकाली देवी १२ वर्षे जात्रा येँय् तःजिक न्यायेकेत थौं स्थलगत निरिक्षण भ्रमण याःगु दु ।

येँय् जात्रा न्यायेकेत ज्यापु महागुथि येँ महानगर समितिया व्यवस्थापनय् गठन जूगु सिकाली अजिमा जात्रा व्यवस्थापन तथा समन्वय समितिया संयोजनय् थौं निरिक्षण भ्रमण याःगु खः ।

भ्रमण टोलीं येँया टेकु पचली, मचली, ब्रह्मत्वाः, कुमाःननिया सिकाली अजिमा, वन्दे, ह्यूमत, न्हूघः, क्वहिति, भिंद्यःत्वाः, मरु, प्याफः, कम्पुकोट, मखंस्थित महिन्द्रेश्वर महाःद्यः जुयाः हनुमानध्वाखा नासः चुकया भ्रमण याःगु खः ।

जात्रायात छुं नं पंगः मवयेक व्यवस्थित रुपं तःजिक क्वचायेकेत जात्रा जुइगु थाय् व लँया अवस्था आदि बांलाक सीकेत निरिक्षण भ्रमण यानागु ज्यापु महागुथिया केन्द्रीय नायः सत्यनारायण डंगोलं धयादिल ।

भ्रमणय् ज्यापु महागुथिया केन्द्रीय नायः डंगोललिसें येँ महानगर समिति नायः पंचलाल महर्जन, यल महानगरपालिका २१ वडाया अध्यक्ष रविन्द्र महर्जन, येँ महानगरपालिका १२ वडा अध्यक्ष बालकृष्ण महर्जन, १७ वडाया अध्यक्ष नवीन मानन्धरलिसें उपस्थित दुगु खः ।

वइगु चैत्र २२ गतेनिसें सिकाली अजिमा १२ दँया जात्रा येँय् न्ह्यायेत्यंगु दु ।

२२ गते सिकाली अजिमाया द्यःगण येँय् थ्यनेधुंकाः थीथी त्वाःया पूजा फयेगुलिसें येँया थीथी थासय् द्यःप्याखं क्यनेगु ज्याझ्वः दु ।

व हे झ्वलय् येँया जात्रा तःजिक क्वचायेकेत व्यवस्थापन व समन्वय समिति गठन याःगु खःसा समितिइ थीथी विभाग तकं नीस्वनाः कजि क्वःछीधुंकूगु दु ।

गुकी प्रचार प्रसार विभागय् श्यामकृष्ण प्रजापति, आर्थिक जुजुकाजी महर्जन, स्वयमसेवक परिचालन किशोर श्रेष्ठ, शान्ति सुरक्षा गणपतिलाल श्रेष्ठ, स्काउट रेडक्रश व ट्राफिक व्यवस्थापन रवि तण्डुकार, मिसा परिचालन विभागय् नानीहेरा डंगोलयात कजि क्वःछ्यूगु दु ।

अथेहे, संस्थागत समन्वय दिपक महर्जन, सांस्कृतिक परिचालन गोविन्द महर्जन, अतिथि सत्कार जगत महर्जन, पूजा व्यवस्थापन ज्ञानीबाबु सिंह, खाद्य व्यवस्थापनय् मचाराजा महर्जन व अन्य व्यवस्थापनय् पुष्परत्न प्रजापतियात भाला ब्यूगु दु ।