हलिंन्यक च्वनाच्वंपिं नेवाःतय् कुसा संगठन हलिं नेवाः दबुलिं संस्थाया संरक्षक दयारत्न शाक्ययात पदं चीकाछ्वःगु दु ।

संस्थाबारे गलत सुचं प्रवाह याःगु व संस्थाविरुद्ध भ्रम ब्वलंकेगु ज्या याःगु धासें दबुलिं शाक्यया संरक्षक पदं लिकाःगु खः ।

दबूया केन्द्रीय नायः संयुक्त श्रेष्ठं शाक्यया नामय् पौ च्वसें वयकःयात पदं चीकाछ्वयागु जानकारी याकूगु खः ।

‘झीगु तजिलजि व भाषा सम्वन्धि छिगु ज्ञानयात जिमिसं च्वछाना तर, संगठनया परियोजना व उकी दुथ्याःपिं मनूतविरुद्ध छिं सार्वजनिक रुपं धयाजूगु खँ छिं कदापि स्वीकार्य मदु’ पत्रय् च्वयातःगु दु ।

थःपिन्त शाक्यं संरक्षकया रुपं मार्गदर्शन व माःगु निर्देशन याइगु अपेक्षा यानागु तर तारन्ताः हे थःपिनिगु अपेक्षा विपरित निराश हे दयेकूगु धकाः पत्रय् च्वयातःगु दु ।

थ्वयां न्ह्यः नं दबुलिं शाक्ययात चेतावनीलिसें छगू पत्र ब्यूगु खः । २२ अप्रिलय् बियागु उगु पत्र धुंकाः नं शाक्यया व्यवहारय् छुं हे ह्यूपाः मवःगु धासें दबुलिं २६ जुनय् मेगु पौ च्वयाः शाक्ययात संरक्षक पदं चीकूगु खः ।