म्येहालामि पुरुषोत्तम श्रेष्ठया म्ये ‘सुथसिया निभाः जुयाः’ सार्वजनिक जूगु दु ।

सोमबाः येँय् जूगु छगू ज्याझ्वःया दथुइ नेपाःया न्हापांगु संकिपा ‘आमा’या आमा वरिष्ठ अभिनेत्री चैत्यदेवी सिंहं उगु म्येया म्यूजिक भिडियो सार्वजनिक यानादिल ।

कन्फराक्टीभ मिडिया सोलुसनं ग्वसाः ग्वःगु ज्याझ्वलय् म्ये सार्वजनिक यासें वरिष्ठ अभिनेत्री सिंहं नेवाः कला ख्यः तब्यानावंगुलिइ लसता प्वंकादिल ।

म्यूजिक भिडियोलय् थम्हं कलाकारतय् स्याःचाः खनागु बिचाः तयादिल ।

वरिष्ठ नृत्य निर्देशक भुवनदास श्रेष्ठं म्यूजिक भिडियोया पात्रय् थम्हं थःत हे खनागु धयादिल ।

‘छगू इलय् जि थः हे सडक दुर्घटनाय् लानाः जुइमफूगु अवस्थाय् छेँय् च्वनेमाःगु खः । थ्व म्यूजिक भिडियोया बाखनय् जिं जिगु व हे अवस्था, खना, जिं थुकी थःत हे खना’ श्रेष्ठं धयादिल ।

वरिष्ठ सिने पत्रकार विजयरत्न तुलाधरं निर्देशक बिराजकाजी राजोपाध्यायं करीब २५दँ न्ह्यः नेपाल टेलिभिनजया हसना ज्याझ्वलय् थःलिसे सहकार्य याःगु लुमंकुसें निर्देशक राजोपाध्यायं तःदँ लिपा हाकनं निर्देशन ख्यलय् याःगु कमब्याकयात लसकुस यानादिल ।

अथेहे, वरिष्ठ गायक जुजुकाजी रंजित, वरिष्ठ संगीतकःमि बुद्ध सायमिं छपु बांलाःगु म्ये व म्यूजिक भिडियो पिदंगु धासें कलाकारिता क्षेत्रय् निरन्तरता बीत गायक श्रेष्ठयात इनाप यानादिल ।

म्यूजिक भिडियो निर्देशक बिराजकाजी राजोपाध्यायं करीब १५ वर्ष लिपा हाकनं म्यूजिक भिडियो निर्देशन यानागु व थुगु भिडियो सकल कलाकारयात समर्पित यानागु धयादिल ।

‘दुर्घटना लगायत थीथी कारणं कलाकारत शारिरीक मानसिक पीडाय् च्वनेमालीगु अवस्था जुइफु । अज्याःगु अवस्थाय् कलाकारयात माःगु ग्वाहालि तिबः झीसं हे बीगु खः । थ्व म्ये अज्याःपिं कलाकारतप्रति समर्पित खः’ निर्देशक राजोपाध्यायया धापू खः ।

म्येहालामि पुरुषोत्तम श्रेष्ठं तःधंगु मिहिनेत यानाः बांलाःगु म्ये दयेकेगु कुतः यानागु धासें हःपाः तिबःया नितिं सकलसित इनाप यानादिल ।

म्यूजिक भिडियो म्येहालामि श्रेष्ठया हे युट्युब च्यानल पुरुश्रेष्ठमार्फत सार्वजनिक जूगु दु ।

दहचोक, मातातिर्थ, खुसिबुँ लगायतया क्षेत्रय् म्यूजिक भिडियोको छायाङ्कन यानातःगु दु । छायाङ्कन व दृश्य सम्पादन पूर्ण महर्जनं यानादीगु दु ।

म्यूजिक भिडियोया परिकल्पना, निर्देशनलिसें म्येग्वः बिराजकाजी राजोपाध्याययागु खः ।

म्यूजिक भिडियोलय् म्येहालामि श्रेष्ठलिसें वयकःया हे जहान रन्जु श्रेष्ठं अभिनय यानादीगु दु ।

संगीत, संगीत संयोजन सुमन कपालीयागु खः ।