लोकंह्वाःगु म्ये ‘छंगु ल्यूल्यू वयाः’ हालादीपिं सरिता महर्जन व अमर चित्रकारया सलय् न्हूगु म्ये ‘गंसि’ पिदंगु दु ।

शनिबाः किपुलिइ जूगु छगू ज्याझ्वःया दथुइ थुगु म्येया म्यूजिक भिडियो सार्वजनिक याःगु खः ।

ज्याझ्वलय् यल महानगरपालिका १६ वडाया वडाध्यक्ष लिसें संगीतकःमि निर्मलरत्न शाक्य, जन संगीत श्रष्टा अमर राज शर्मा राजोपाध्याय व वरिष्ठ द्वन्द निर्देशक राजेन्द्र खडगीं म्येया बारे न्ववासें छपु बांलाःगु म्ये व म्यूजिक भिडियो पिदंगु खँ तयादीगु खः ।

थुगु म्येया म्यूजिक भिडियोयात लोकंह्वाःम्ह म्येहालामि, गितारिस्ट भुपेन्द्र बज्राचार्यं परिकल्पना लिसें निर्देशन नं यानादीगु दु ।

ज्याझ्वलय् न्ववासें म्यूजिक भिडियो निर्देशक बज्राचार्य छपु बांलाःगु व न्ह्यइपूगु म्यूजिक भिडियो स्वयां म्यूजिकल सर्ट फिल्म दयेकेत स्वयागु धयादिल ।

म्यूजिक भिडियोलय् अमर चित्रकारयात राजेन्द्र खड्गी व आराध्यालक्ष्मी खड्गीयात आशिका तामाङ कथं क्यनातःगु दु ।

म्येहालामि व म्यूजिक भिडियोया मोडल अमर चित्रकार, मोडल आराध्य लक्ष्मी खडगीलिसेंनं थःथःथु नुगःखँ तयादीगु खः ।

म्येया रचनाकार व संगीतकार नं भुपेन्द्र हे खः । म्यूजिक भिडियोया छायाङ्कन व दृश्य सम्पादनया ज्या अमर चित्रकारं यानादीगु दु ।

म्यूजिक भिडियोलय् भेष महर्जन, भुपेन्द्र बज्राचार्य, चिरिबाबु महर्जन, सुनेश शाक्य व राम चित्रकारलिसें यक्व हे कलाकारपिन्सं अभिनय यानादीगु दु ।