‘सुथसिया निभाः’ म्ये हालाः लोकं ह्वाःम्ह म्येहालामि पुरुषोत्तम श्रेष्ठया न्हूगु म्ये ‘द्यंसा छ दंसा छ’ पिदंगु दु ।

म्येहालामि श्रेष्ठं थम्हं हे च्वयादीगु थुगु म्येया म्यूजिक भिडियो अडियो नेपाल युट्युब च्यानलपाखें थौं (आइतबाः) सार्वजनिक जूगु खः ।

म्यूजिक भिडियोस म्येहालामि श्रेष्ठलिसें वयकःया हे तिरि मयजु रन्जु श्रेष्ठं अभिनय यानादीगु दु ।

म्येया छायाङ्कन येँया मातातीर्थलिसें अस्ट्रेलियाय् तकं यानातःगु दु । म्येहालामि श्रेष्ठया मातातीर्थया लू बुद्ध सायमिं छायाङ्गन यानादीगु खःसा मोडल कलाकार रन्जुया लू अस्ट्रेलियाय् जिमोस गोपालीं छायाङ्कन यानातःगु खः ।

थुगु म्ये थः तिरि रन्जु अस्ट्रेलिया वनाच्वंबलय् च्वयागु जानकारी म्येहालामि श्रेष्ठं बियादिल ।

‘रन्जु अस्ट्रेलियाय् वनाच्वंबलय् थन जि याकःचा जुयाच्वंबलय् व हे भावनाय् च्वयागु खः । म्येया भिडियो नं उबलेया जिगु फिलिंग्स जि नेपालय् च्वनां तापाक्क च्वनाच्वंम्ह थः यज्युयात लुमंकाच्वंगु कथं हे दयेकागु खः’ श्रेष्ठं धयादिल ।

म्येय् संगीतकार शिव शाहिं लय् बियादीगु दु । दृश्य सम्पादनया ज्या बुद्ध सायमिं यानादीगु दु ।