नेपालभाषाया न्हापांगु ओटीटी प्लेटफर्म ‘नेवाः फ्ल्क्सि’ सार्वजनिक जूगु दु ।

ईल्वहँ इन्टरटेनमेन्टया ग्वसालय् शनिबाः किपुलिइ जूगु छगू ज्याझ्वलय् ‘नेवाः फ्लिक्स’ सार्वजनिक याःगु खः ।

ज्याझ्वलय् न्ववासें चलचित्र विकास बोर्डया नायः दिनेश डिसिं पुलांगु सेल्युलोइड नेपाली संकिपात डिजिटाइज यायेगु ज्या विकास बोर्डं न्ह्यःने यंकागु व उकी सिलु व राजमति संकिपायात प्राथमिकताय् तयागु जानकारी बियादिल ।

‘नेपालभाषाया न्हापांगु ‘सिलु’या नेपालया न्हापांगु मातृभाषी संकिपाया रुपं बिस्कं इतिहास दु । थ्व हे सिलु संकिपा लिसें नेपालभाषाया निगूगु सेल्युलोइड संकिपा ‘राजमति’यात डिजिटाइज यायेगु ज्याय् प्राथमिकताय् तयागु दु’ नायः डिसिं धयादिल ।

अथेहे, वरिष्ठ फोटो पत्रकार राजभाई सुवालं नेपाली संकिपात हलय् रिल दयेकाः छगू हलं मेगु ब्वाँय् जुइमाःगु दिं लुमंकुसें आः ‘नेवाः फ्लिक्स’ वयेधुंकाः नेवाः संकिपा हलिंन्यंक सकसिगु ल्हातय् ल्हातय् थ्यंगु बिचाः तयादिल ।

नेपालभाषाया न्हापांगु ओटीटी प्लेटफर्म ‘नेवाः फ्लिक्स’ ईल्वहँ इन्टरटेनमेन्टं बजारय् हःगु खः ।

ईल्वहँ इन्टरटेनमेन्टया सिओओ दर्शनबीर शाक्यं करीब निदँ मदिक्कया मेहनत धुंकाः नेवाः फ्लिक्स सार्वजनिक यायेत ताःलाःगु धयादिल ।

‘नेपालभाषाया संकिपात हलय् हे क्यनेगु व हलय् हे वनां स्वःवनेगु लकस नं दयेकेमाः तर, भूगोल वा मेगु छुं हुनिं हलय् स्वःवनेमफुपिं हलिंन्यंकया हरेक स्वकुमिया लागिं नेवाः फ्लिक्स छगू बांलाःगु माध्यम जुइ धइगु विश्वास दु’ शाक्यया धापू खः ।

कीर्तिपुर सिनेप्लेक्सया संचालक नरेन्द्र महर्जनं नेवाः संकिपा उत्थानय् थः मदिक्क ज्या यानाच्वनेगु प्रतिवद्धता प्वंकुसें नेवाः संकिपा क्यनेज्याय् छुं समस्या वःसा स्वापू तयेत आह्वान यानादिल ।

ईल्वहँ पब्लिकेशनया प्रवन्ध निर्देशक नरेशबीर शाक्यं पब्लिकेशनं वंगु २६दँ न्ह्यःनिसें निरन्तर रुपं थीथी पत्रिका पिथनाच्वनागु व आधुनिक प्रविधिलिसें न्ह्याःवनेत ईल्वहँ इन्टरटेनमेन्ट न्ह्याकागु धयादिल ।

ईल्वहँ इन्टरटेनमेन्टया हामा प्रज्ञादेवी शाक्यं नेवाः संकिपा, संस्कृति, सम्पदायात डिजिटल माध्यमं हलिंया कुंकुलामय् थ्यंकेगु आज्जुं नेवाः फ्लिक्स न्ह्याःगु धयादिल ।

नेवाः फ्लिक्स न्ह्याःगु लसताय् आइतबाः सनिलया ५ताः ईतकया लागिं थुकी दुगु हलंज्वलं सितिकं स्वयेफइगु ईल्वहँ इन्टरटेनमेन्टं धाःगु दु ।