सामाजिक सञ्जाल फेसबुकमार्फत सक्रिय नेपालभाषा साहित्यिक अभियान चिबाखं साहित्यया न्हयक्वःगु दँमुँज्याया झ्वलय् ‘ख्वाःपौ’ सार्वजनिक जूगु दु ।

संस्थाया दुजः साहित्यकारपिं ध्रुव मधिकर्मी, केदार सितु, नरेश अमात्य, विमल ताम्राकार, सुरेन्द्रलाल भुजू, रिता महर्जन व दिव्या बज्राचार्यं उगु ख्वाःपौ उलेज्या यानादिल ।

ख्वाःपतिइ दछियंक जूगु धेंधें बल्लाखय् सिरपाःः त्याकूगु चिबाखं, छवाःन्यंक न्ह्याकूगु चिबाखंया समीक्षा लिसें चिबाखंसम्बन्धी पिदंगु छुं अभिलेखत दुथ्याकातःगु दु ।

ज्याझ्वलय् न्ववासें बाखंमि ध्रुव मधिकर्मीं थौंकन्हय् चिबाखं च्वज्या तसकं सक्रिय जुयाच्वंगु धासें आः उकी विविधता व स्तरीयता आवश्यक दुगु बिचाः तयादिल ।

समीक्षक डा पुष्पराज राजकर्णिकारं थज्याःगु कुतलं चिबाखंया विकासय् महत्वपूर्ण योगदान बीगु धयादिल ।

मेम्ह समीक्षक पूर्ण ताम्राकारं स्रष्टातयसं थःगु सिर्जना सशक्त दयेकेत मेपिनिगु रचना नं ब्वनेमाःगु आवश्यकता न्ह्यथनादिल ।

संस्थाया कजि नरेश अमात्यं संस्थां यानावःगु ज्याखँ, आज्जु व योजनाया बारे कनादिल ।

ज्याझ्वलय् हरिगोविन्द भोमी, कविन्द्रलाल अमात्य, मचाकाजी महर्जन, तेज हमाल, रामेश श्रेष्ठ व विष्णुकेसरी ताम्राकारं थःथःगु चिबाखं ब्वनां न्यंकादीगु खः ।

नेपालभाषाया चिबाखंया प्रवर्ध्दन व अभिलेखीकरणय् ज्या यानावःगु चिबाखं साहित्यं ख्वाःपौमार्फत समकालीन साहित्यिक गतिविधि थप बल्लाकीगु अपेक्षा काःगु दु ।