येँ । आदिवासी जनजाति महासंघ (नेफिन) या ११क्वःगु रास्ट्रीय महाधिवेशनया मुल नारा, लोगो व पोस्टर सार्वजनिक जूगु दु ।

आइतबाः पत्रकार सम्मेलनमार्फत नेफिनं वइगु माघ ९ व १० गते विराटनगरय् जुइत्यंगु ११क्वःगु महाधिवेशनया नारा, लोगोलिसें पोस्टर सार्वजनिक याःगु खः ।

११क्वःगु महाधिवेशनया नितिं ‘प्राकृतिक श्रोत जल, जमिन व जङ्गलय् आदिवासी जनजातिया अधिकार सुनिश्चित या’, ‘प्राचीन सभ्यता व ऐतिहासिक पृष्ठभुमिया पहिचानया लिधंसाय् प्रदेशया हाकनं नामाङ्कन या !!’ नारा क्वःछ्यूगु दु ।

महासंघया नायः लिसें महाधिवेशन मूल आयोजक समितिया कजि गेल्जे लामा शेर्पां महाधिवेशनयात तःजिक सुथांलाकेत थीथी १२ उपसमिति नीस्वनां तयारी जुयाच्वंगु जानकारी बियादिल ।

नेपालया मुक्कं आदिवासी जनजाति समुदाययात गोलबद्ध यासें पहिचानलिसेंया सामूहिक अधिकार स्थापित यायेगु धासें २०४७ सालय् नेपाल आदिवासी जनजाति महासंघया स्थापना जूगु खः ।

नेपालया मुक्कं जनसंख्यामध्ये करिब ३६ प्रतिशत आदिवासी जनजातिया ल्याः दु ।

नेपाल सरकार आदिवासी जनजाति उत्थान राष्ट्रिय प्रतिष्ठानय् दुथ्याःगु ६० आदिवासी जनजाति समुदायमध्ये महासंघय् ५६ समुदाय व थीथी १२ सम्बद्ध संगठन आबद्ध दुगु जानकारी पत्रकार सम्मेलनय् ब्यूगु खः ।

अथेहे, थीथी २५ देशय् महासंघया प्रवास संगठन, देय्न्यंकया ७ प्रदेश समन्वय परिषद्, ७७ जिल्ला समन्वय परिषद्, स्थानीय पालिका व वडा समन्वय परिषदमार्फत सङ्गठित जुयाः ज्या यानाच्वनागु महासंघया नायः शेर्पां धयादिल ।