थुगुसीया बाल दिवसय् जावलाख्यलय् बाल दिवस मेला जुइगु जूगु दु ।

जाउलाख्यःस्थित लभ्ली होम प्रिस्कूलं वइगु भाद्र २९ गते शनिबाः राष्ट्रिय बाल दिवसया लसताय् बाल दिवस मेलाया ग्वसाः ग्वयेत्यंगु खः ।

लभ्ली होमं यल जाउलाखेलस्थित खेल मैदानय् बाल दिवस मेला २०८१ या ग्वसाः ग्वयेत्यंगु खः ।

मंगलबाः लभ्ली होमं यलय् पत्रकार सम्मेलन यासें थीथी सांस्कृतिक ज्याझ्वः व विद्यार्थीतय् नितिं कासा गतिविधिलिसें मेला यायेत्यनागु जानकारी ब्यूगु खः ।

लभ्ली होम प्रिस्कूलया संस्थापक माहेश्वरी अमात्यं मचातय् मचासूयात अभिभावकलिसे स्वानाः थीथी कासा, सांस्कृतिक व मेमेगु गतिविधिलिसें मेलाया ग्वसाः ग्वयेत्यनागु धयादिल ।

‘मचातय् मचासूलिसे स्वानाः अभिभावकयात थःगु मचा ईया अनुभूति याकेगु स्वयागु खः, गुकिं बाल दिवसयात छगू उत्सवया रुप बीफयेमा’ संस्थापक अमात्यं धयादिल ।

फाडर्स डे, मडर्स डेयात उत्सवया रुप बीपिं मचातय् बाल दिवसयात जक छाय् उत्सवया रुपं महनेगु धकाः नं अमात्यं न्ह्यसः थनादिल ।

ज्याझ्वलय् मेमेगु मनोरन्जनात्मक न्ह्यब्वयालिसें पुस्तान्तरणया माध्यम कथं विद्यार्थीतयसं ज्याझ्वलय् लाखेय्, पुलुकिसिया प्याखं तकं न्ह्यब्वइगु जानकारी लभ्ली होमया डान्स कोअर्डिनेटर सुजन बज्राचार्यं बियादिल ।

उगु हे पत्रकार सम्मेलनय् यल लायकू मिप्वाः लाखय् पुचःया संरक्षक उत्तम रत्न शाक्यं लाखेय् लिसेंया स्थानीय संस्कृति उकिया मूल मर्म दुने च्वनाः विद्यार्थीतय् मार्फत पुस्तान्तरण यायेगु बांलाःगु विषय जूगु बिचाः तयादिल ।

‘विद्यार्थीतयसं लाखय् प्याखं ल्हुइबलय् उमिसं लाखयया बारे सीकी, सयेकी, थुइकी । लालाःथाय् प्याखं ल्हुकाः दुरुपयोग जकं यायेमजिल, भविष्यया कर्णधारतयत संस्कृति स्यनेगु ला बांलाःगु खँ खः’ संरक्षक शाक्यं धयादिल ।

ज्याझ्वलय् थीथी सांस्कृतिक गतिविधिलिसें कार्यक्रमया मू आकर्षणया रुपं निशा देसार व रोजमान महर्जनया न्ह्यब्वया नं दइगु जानकारी पत्रकार सम्मेलनय् ब्यूगु खः ।

लिसें थीथी नसा ज्वलंया स्टल, कासा गतिविधिलिसें सुथसिया ११ताः इलंनिसें सनिलया ४ताः ईतक मेला जुइगु जानकारी ग्वसाः खलकं ब्यूगु दु ।