गायक सुमन बज्राचार्यया म्ये ‘लँय् वइम्ह’ या म्युजिक भिडियो सार्वजनिक जूगु दु ।

यलय् जूगु छगू ज्याझ्वःया दथुइ नांजाःम्ह सन्चारकःमि लिसें निर्देशक रामकृष्ण खड्गीं म्यूजिक भिडियोया पितब्वज्या यानादिल ।

ज्याझ्वलय् न्ववासें संचारकःमि लिसें निर्देशक रामकृष्ण खडगीं गायक सुमन बज्राचार्य छुं ई सुलं च्वनेधुंकाः आः हाकनं संगीत ख्यलय् खनेदयक वःगु धइगु वयकःया संगीतप्रतिया मतिना खः धासें भिंतुना देछानादिल ।

वरिष्ठ सिने पत्रकार असंबरें म्यूजिक भिडियोय् मूल रुपं डान्सिंग स्टेपयात बः बियातःगुलिं ल्यायम्ह पुस्ताया नुगः सालेफइगु टिप्पणी यानादिल ।

ज्याझ्वलय् लोकंह्वाम्ह म्येहालामि निशा देसार, सन्चारकःमि लिसें कलाकार स्वतन्त्र संसार महर्जन, नांजाःम्ह क्यामेरापर्सन शंकर महर्जनलिसेंया उपस्थिती दुगु खः ।

म्यूजिक भिडियोया निर्देशन सचिका चिनां, ङेङापाः झ्यःया दरबारलिसेंया आपालं म्युजिक भिडियो दयेकेधुंकूम्ह विश्वास बज्राचार्यं यानादीगु दु ।

छायाङ्कन लिसें दृश्य सम्पादनया ज्या आकृष्ट शाक्यं यानादीगु खः ।

उपासना शाक्यं कलाकारया रुपं अभिनय लिसें कोरियोग्राफि नं यानादीगु दु । मिजं मोडल कथं विशुम राज शाक्यं मू भुमिका म्हितातःगु दु ।

थ्व म्येया च्वमि व लय् चिनामि फिरोज बज्राचार्य खः ।