Apexcoder  tech

पत्रकार दबू येँ जिल्लाया नगुमां पिदन

eBukhan – मिलिन्द,    २०८३ मङ्सिर ४, बिहिबार    वर्गीकृत समाज

नेवाः पत्रकार राष्ट्रिय दबू येँ कचाया ग्वसालय् न्हूदँ नेपाल सम्वत ११४७ या भिन्तुना कालबिल ज्याझ्वः जूगु दु ।

थौं (बिहिवाः) शंखधर दिवसया दिनस पत्रकार दबू येँ कचां दिवसलिसें ने.सं. ११४७  न्हूदँया भितुना कालबिल ज्याझ्वः याःगु खः । उगु हे ज्याझ्वलय् न्हू दँ ११४७ या नगुमां (क्यालेण्डर) या पितब्वज्या नं याःगु खः ।

पत्रकार दबूया केन्द्रीय नायः नृपेन्द्रलाल श्रेष्ठ, न्वकू सुरेन्द्रभक्त श्रेष्ठ, छ्यान्जे राजु नापित, बागमति प्रदेश समितिया नायः बिराजकाजी राजोपाध्याय, गोरखा जिल्ला नायः हिरालाल श्रेष्ठलिसें नं मंकाः कथं नगुमां पितब्वज्या यानादिल ।

ज्याझ्वलय् दबूया केन्द्रीय नायः श्रेष्ठं नेवाः पत्रकारतय् हकहितलिसें थौंकन्हय् राज्यस्तरं छापा पत्रकारतयत यानाच्वंगु विभेदपूर्ण व्यवहार अले पत्रकारतयत ज्वनेगु थुज्वःगु थीथी गतिविधियात कयाः विरोधया ज्या न्ह्यानाच्वंगु खँ तयादिल ।

दबूया केन्द्रीय न्वकू सुरेन्द्रभक्त श्रेष्ठं दबूया प्रदेश संरचना व विदेश शाखा स्वनेधुंकाः वय्कःपिनि तकं ब्वतिइ ज्याझ्वः जूगुलिइ लसता प्वंकादिल ।

दबूया केन्द्रीय सल्लाहकार राजु शाक्यं थःपिन्सं राससय् नेपाल संवतयात छ्यलेत स्वयाबलय् न्हापां सकारात्मक खँ वःसां लिपा पूवंक मखुसे संवत् जक छ्यःगु धयादिल ।

दबूया बागमती प्रदेश नायः बिराजकाजी राजोपाध्यायं दबू थुज्वःगु संस्था आर्थिक रुपं सबल जुयाः धस्वायेमाःगु व आः थःगु हे भवन दयेकेत न्ह्यज्यायेमाःगु खँ तयादिल ।

दबू येँ कचाया नायः रत्नकाजी मनं येँ जिल्लां यानाच्वंगु थीथी गतिविधि व न्हूदँया क्यालेण्डरया विषययात कयाः थःगु नुगः खँ तयादिल ।

दबू येँ जिल्लाया दुजः लिसें प्रकाशन कमिटीया संयोजक रबिन्द्र बज्राचार्यं दबूपाखें न्हापांगु खुसि थुगु नगुमा पिकाःगु व याकनं हे ख्वाःपौकथं म्यागजिन पिकायेत्यनागु जानकारी बियादिल ।

ज्याझ्वलय् यल जिल्लाया नायः मञ्जु बज्राचार्य, गोरखा जिल्लाया नायः हेरालाल श्रेष्ठ, ज्यापु संस्कृति विकास कोषया न्वकु सन्त कुमार महर्जन, नेवाः देय् दबूया न्वकु शान्त श्रेष्ठ, छ्याञ्जेपिं सृजनमान श्रेष्ठ, हरिकुमार श्रेष्ठ, वरिष्ठ कलाकार गणेश साय्मि, संस्कृतिविद् जितेन्द्र विलास बज्राचार्यलिसेंया उपस्थिती दुगु खः ।