बेलायतय् नेपाल भाषाया फिल्म ‘इन्दिरा धिमे मैंचा’या निर्देशक सुरेन्द्र तुलाधर व नायिका रोजिना सुवालं अवार्ड त्याकूगु दु ।

बेलायतया एम्पायर हलय् जूगु ‘निक्वःगु नेपाल आदिवासी जनजाति संकिपा महोत्सव (एनआईएफएफ) य् निर्देशक तुलाधरं ‘इन्दिरा धिमेय् मैंचा’ संकिपापाखें उत्कृष्ट निर्देशकया अवार्ड त्याकेत ताःलाःगु खः ।

अथेहे, उगु हे संकिपापाखें नायिका रोजिना सुवालं उत्कृष्ट अभिनेत्रीया अवार्ड त्याकूगु खः ।

उकिया नापं संयुक्त श्रेष्ठं दयेकादीगु नेपालभाषाया एनिमेशन संकिपा ‘जय लाखय्’ उत्कृष्ट एनिमेशन फिल्म अवार्ड त्याकेत ताःलाःगु दु ।

उगु संकिपा महोत्सवय् लिम्बू फिल्म ‘मुन्धुमः ए सेक्रेट अफ साम’ यात आदिवासी फिचर फिल्म अवार्ड वंगु दु ।

अथेहे, मगर फिल्म उत्कृष्ट सहायक अभिनेताया अवार्ड ‘देसान’ या भोला सापकोटां त्याकल सा मगर फिल्म ‘रोष’ पाखें दिपेन बस्न्यातं उत्कृष्ट सिनेम्याटोग्राफरया अवार्ड त्याकल ।

गुरुङ फिल्म ‘तेनोकुर्सी–ढोगभेट’या राजेन्द्र खड्कां उत्कृष्ट सम्पादक, गणेश गुरुङ ‘सुभाषं’ उत्कृष्ट लेखक अवार्ड त्याकेत ताःलात । सिक्किमया लिम्बू फिल्म ‘नुमाहाङ्गा’ या नियरा सुब्बां उत्कृष्ट डेब्यु निर्देशक अवार्ड त्याकल ।

शर्ट फिल्म विधाअन्तर्गत ‘तासिङ’ उत्कृष्ट शर्ट फिल्म क्वःज्यूबलय् ‘चारदामं’ उत्कृष्ट जुरी अवार्ड त्याकल । ‘बाल्ढ्याङ्गगढी’ उत्कृष्ट वृत्तचित्र व ’विराटनगरया ‘प्राचीन राजवंशी’ उत्कृष्ट एआई (AI) वृत्तचित्र अले ‘तान्त्रिक डान्स’ यात उत्कृष्ट वृत्तचित्र जुरी अवार्ड वन ।

महोत्सवया न्हापांगु चरणय् फिचर फिल्म व डकुमेन्ट्रीत क्यनेगुलिसें नेवाः, लिम्बू, मगर व सुनुवार समुदायया सांस्कृतिक झाँकी व हुलाप्याखं नं न्ह्यब्वःगु खः ।

ज्याझ्वलय् नेपाल आदिवासी जनजाति महिला महासंघ युकेया नायः, गंगामाया दुरा, फेस्टिभल निर्देशक व चलचित्र निर्देशक समाजया नायः अरुण कुमार प्रधानं थजाःगु महोत्सवं आदिवासी संकिपाकःमितयत अन्तर्राष्ट्रिय दबुलिइ दनेत ग्वाहालि याइगु विश्वास प्वंकादिल ।

फेस्टिभल निर्देशक प्रधानं महोत्सवया स्वकःगु संस्करण आकिवं सन् २०२७ मे १ तारिखकुन्हु जुइगु घोषणा नं यानादिल ।