नेवाः पत्रकारतय् मंकाः संगठन नेवाः पत्रकार राष्ट्रिय दबुलिं संगठन विस्तारया झ्वलय् बागमति प्रदेश नीस्वंगु दु । बुधबाः येँय् छगू ज्याझ्वः यासें दबुलिं थःगु न्हापांगु प्रदेश संरचना बागमति प्रदेश समिति नीस्वंगु खः ।

येँय् जूगु बागमति प्रदेश अधिवेशनं पत्रकार बिराजकाजी राजोपाध्यायया नायःसुइ १३ दुजःया ज्यासना पुचःया सर्वसम्मत ल्यःगु दु ।

सर्वसम्मत निर्वाचित ज्यासना पुचःया न्वकू (खुल्ला) पदय् विनोद श्रेष्ठ व न्वकू (मिसा) य् कुसुम बज्राचार्ययात ल्यःगु दु । अथेहे, छ्यान्जेया भाला शनिराज शाक्ययात व दांभरिंया भाला श्याम था श्रेष्ठयात ब्यूगु दु ।

ल्यू छ्यान्जे (खुल्ला)य् विश्वनाथ ताम्राकार व ल्यू छ्यान्जे (मिसा)य् विष्णुदेवी महर्जन ल्यःगु दु ।

दुजलय् सुरज मानन्धर, राजु महर्जन (जुजु), मदनराम कर्माचार्य, पुनमाया (श्रेष्ठ) कर्माचार्य, दिपक कायस्थ श्रेष्ठ व ज्ञानदेव श्रेष्ठ दु ।

न्हूनिर्वाचित नायः राजोपाध्यायं संस्थाय् पद औपचारिकता जक खःगु बिचाः तसें सामूहिक नेतृत्व व सामूहिक निर्णयलय् न्ह्याःवनेगु प्रतिवद्धता प्वंकादिल ।

‘संगठनया हे न्हापांगु प्रदेश संरचना जूगु ल्याखं थ्व समिति व ज्यासना पुचः ऐतिहासिक ला खः, नापं झीगु न्ह्यःने यक्व हे हाथ्या व तःधंगु जिम्मेवारी नं दु । बागमति प्रदेश समितियात नेवाः पत्रकारतय् छगू शक्तिया रुप बियाः सकलें जानां न्ह्याःवनेनु’ नायः राजोपाध्यायया धापू खः ।

न्हूनिर्वाचित नायः राजोपाध्याय समाचारडेस्क डट कमया सम्पादकलिसें ईबुखँ डट कमया नायः नं खः । वयकः थौंकन्हय् ईमेज च्यानलय् नेपालभाषाया न्यूज एंकर कथं ज्या यानाच्वनादीगु दु ।

राजोपाध्यायं वि.सं. २०५४य् गुडनाइट एफ.एम. नेपालभाषा ज्याझ्वलय् बुखँ बियाः विद्युतीय संचारमाध्यमय् पत्रकारिता न्ह्याकादीगु खः ।

थ्वयां न्ह्यः ज्याझ्वःया उलेज्या सत्रय् दबूया केन्द्रीय नायः नृपेन्द्रलाल श्रेष्ठ, न्वकू सुरेन्द्रभक्त श्रेष्ठ, मूछ्यान्जे केके मानन्धर, दांभरिं बाबुकाजी साँछेँ श्रेष्ठ व बागमति प्रदेश अन्तर्गतया जिल्ला समितिया नायःतयसं थःथःगु बिचाः तःगु खः ।

पत्रकार राष्ट्रिय दबूया स्थापना नेपाल सम्वत ११३२य् जूगु खः । दबूया न्याक्वःगु अधिवेशन वइगु भाद्र १९ व २० गते गोरखा जिल्लाया मिलनबस्तीइ जुइत्यंगु दु ।