मगन ईन्टरटंटमेंटया ‘तंचाये मते न्हां’ पिदन मगन ईन्टरनेटमेन्टया लुखां छपु न्हूगु म्ये ‘तं चायेमते न्हां’ पिदंगु दु ।

शनिबाः किपुलिइ बोसिगां पुचःया ग्वसालय् जूगु छगू ज्याझ्वःया दथुइ उगु म्ये सार्वजनिक याःगु खः ।

चन्द्रागिरि नगरपालिकाया नगर प्रमुख घनश्याम गिरीं म्ये सार्वजनिक यानादीगु खः ।

नगर प्रमुख गिरीं चन्द्रागिरि नगरपालिका संस्कृति व संस्कारया तःमि नगर खः धासें ‘तं चायेमते न्हां’ म्येया म्यूजिक भिडियोस नेवाः लजगाः व तजिलजि क्यनेत नगरपालिकां फूचाःकथं ग्वाहालि यानागु जानकारी बियादिल ।

ज्याझ्वलय् म्येया च्वमिलिसें लयचिनामि रकि महर्जनं म्येया जानकारी तयादिल ।

नेपालभाषाया न्हापांम्ह म्युजिक भिडियो निर्देशक विजयरत्न असंबरें ल्यायम्ह पुस्ता छ्यलाः नेवाः परम्परागत लजगाःयात पर्दाय् हःगु हे थ्व म्युजिक भिडियोया विशेषता खः धयादिल ।

ज्याझ्वलय् चन्द्रागिरी नगरपालिका वडा १० या वडाध्यक्ष शिवकुमार महर्जन, कलाकार मनोज महर्जन, म्येहालामि राज सायमी व नीतेश तण्डुकारलिसें नं नुगः खँ तयादीगु खः ।

म्येय् राज सायमि व मृनाल मानन्धरं सः बियादीगु दु ।

थुगु म्यूजिक भिडियोयात रजिन महर्जनं छायाङ्कन, दृश्य सम्पादन व निर्देशन यानादीगु दु ।

थौंकन्हय् लोकंह्वाःम्ह कलाकार मनोेज महर्जन व सृष्टि महर्जनया मूभुमिका दुसा नितेश तण्डुकारलगायत आपालं कलाकारपिन्सं अभिनय यानादीगु दु ।