येँ महानगरपालिका १२ वडां स्नातक तगिं तालाःपिं पेशाकर्मी व स्नातकोत्तर तगिं ताःलाःपिं विद्यार्थी सकसित सम्मान याइगु जूगु दु ।

थौं (बिहिबाः) वडाय् पत्रकारतलिसे खँ ल्हासें येँमपा १२ वडाया वडाध्यक्षलिसें महानगरपालिकाया वातावरण समिति कजि वालकृष्ण महर्जनं थुगु जानकारी बियादीगु खः ।

वडाध्यक्ष महर्जनं व्यक्तित्व व पेशा पहिचान अले ल्यायम्हतयत भविष्यप्रति सकारात्मक दयेकेत थगुनेनिसें सम्मान ज्याझ्वः न्ह्याकागु धयादिल ।

वडाया स्थायीवासीयात बीगु थ्व सम्मानया लागिं जेठ ११ गते दुने शैक्षिक योग्यता अले पेशाकर्मीया लागिं नवीकरण जूगु दसिपौया प्रतिलिपि बीहयेत वडां इनाप याःगु दु ।

‘सम्मानया दिनय् वडाबासीयात न्हिथंया व्यस्त जीवन दथुं छथाय् मुनेगु अले थवंथवयय थःथःगु पेशा सीकेगु ज्या जुइ । थःत माःगु पेशालिसे सम्बन्धित सेवा वडाबासीपाखें हे अःपुक कायेगु लकस थुकिं दयेकी’ वडाध्यक्ष महर्जनं स्पष्ट यात ।

वडां २०८१ सालय् ६७ विद्वत व्यक्तित्व, चक्रेश्वर, गुरु, नायः, कजि यानां ३४म्हेसित, २०८२ सालय् १६३ व्यक्तित्वयात हंगु खः ।

थुगुसी विद्वत वर्गय् इञ्जिनियर, एमबीबीएस डाक्टर, चार्टर अकाउन्टेन, रजिष्ट्रर्ड अडिटर, पाइलट, विद्यालय–क्याम्पसका प्रधानाध्यापकत, राष्ट्रिय अन्तर्राष्ट्रिय कासा धेंधें बल्लाःया पदक त्याकामिलिसेंयात हनेगु योजना वडाया दु ।