येँ/प्रतिनिधि सभा सदस्य कुलभक्त शाक्यं सरकारी विज्ञापन नीजि संचार माध्यमयात मबीगु सरकारया निर्णय विरुद्ध संसदय् सः तयेगु धयादीगु दु ।

येँय् जूगु लहना वाःपौया १३दँया वार्षिकोत्सव ज्याझ्वलय् न्ववासें संघीय सांसद शाक्यं आः संचारमाध्यम तसकं थाकूगु अवस्थां न्ह्याःवनाच्वंगु इलय् वयाः सरकारी विज्ञापन सरकारी संचारमाध्यमय् जक बीगु सरकारया निर्णयं नीजि संचारमाध्यमयात म्वयेथ्याये थें जूगु बिचाः तयादिल ।

‘आवाजविहिन जनताया सः न्ववाइगु संचारमाध्यमयात संरक्षण यायेमाःगुलिइ सरकारं झन अःखतं दुगु सुविधा क्वपालेगु खेदजनक खः । नीजि संचारमाध्यमलिसें मातृभाषी संचारमाध्यमया पक्षय् जिं संसदय् सः ल्ह्वनेगु व निर्णय भिंकेत सरकारयात दबाव बीगु प्रतिवद्धता प्वंकाच्वना’ शाक्यं धयादिल ।

मेगु प्रसङ्गय् न्ववासें शाक्यं छुं हे विकल्प मब्युसें सुकुम्वासी बस्तीइ डोजर यंकाः दक्वदाक्व थुनाबी मज्यूगु बिचाः तयादिल ।

उगु हे ज्याझ्वलय् न्ववासें नेवाः देय् दबूया नायः रश्मिला प्रजापतिं हुकुमावासीया नां बियाः दक्वसित छगू हे मिखां स्वयेमज्यूगु धयादिल ।

सडक विस्तार, खोला मापदण्ड, फास्ट ट्राएकलिसें थीथी मापदण्ड, आयोजनाया नामय् राज्यं हे रैथानेतयत नं सडकय् थ्यंकाः सुकुम्वासीया अवस्था दयेकाब्यूगु दुगु नायः प्रजापतिं धयादिल ।

‘नक्कली सुकुम्वासीयात चीके हे माः खः तर, वास्तविक सुकुम्वासीतयत ला सरकारं व्यवस्थापन यायेमाल नि । विकल्प मब्युसे, व्यवस्थापनपाखे मवंसे जबरजस्ती डोजर यंकाः विस्थापन यायेगु ज्या राज्यया बरबरता खः’ प्रजापतिया धापू खः ।

ज्याझ्वलय् येँ महानगरपालिकाया निवर्तमान प्रमुख विद्यासुन्दर शाक्य, आदिवासी जनजाति पत्रकार महासंघया नायः लक्की चौधरी, प्रेस काउन्सिल नेपालया मुख्य अधिकृत झविन्द्र भुसाललिसें नं लहना साप्ताहिकयात भिंतुना देछासें थःथःगु नुगःखँ तयादीगु खः ।

ज्याझ्वलय् थीथी सिरपाः व सम्मान नं लःल्हाःगु खः ।

२०द्वः तका राशीलिसेंया लहना धर्ममोति पत्रकारिता सिरपाः ११४५या लागिं एपिवानकर्मी राजु नापितयात व ११४६ या लागिं खबरसेन्टर अनलाइनया उत्तमकुमार श्रेष्ठयात लःल्हाःगु खः ।

अथेहे, १०द्वः तका राशीलिसेंया लहना केशव कृष्णवदन मातृभाषा पत्रकारिता पुरस्कार ११४५ या लागिं ईमेजकर्मी केके मानन्धरयात व ११४६ या लागिं नेपाल टेलिभिजनकर्मी शकुन्तला महर्जनयात ब्यूगु खः ।

लहना शर्मिष्ठा सुर सम्मान ११४५ पाखें वरिष्ठ निर्देशक पवन जोशी व ११४६ या लागिं कलाकार आराध्यालक्ष्मी खड्गी सम्मानित जुल ।

थुगुसीनिसें लहनां मदुपिं पत्रकारद्वय सुशील बीरसिं कंसाकार व सुरेशकिरण मानन्धरया नामं नं पत्रकारिता सिरपाःया सुरुवात याःगु दु ।

लहना सुशीलबीर सिंह पत्रकारिता सिरपाः ११४६ नेपाल समाचारपत्रया सहायक सम्पादक सुनिल महर्जनयात बिल । थुगु सिरपाःया राशी २०द्वः तका दु ।

अथेहे २५द्वः राशीलिसेंया लहना सुरेशकिरण पत्रकारिता सिरपाः ११४६ पाखें वरिष्ठ कार्टुनिष्ट रविन साय्मि सम्मानित जुल ।

सम्मानितपाखें नेपाल समाचारपत्रया सहायक सम्पादक महर्जन व तका सिरपाःया दातापाखें जगतबीर सिंह कंसाकार व डा. विजय प्रकाश सैंजुं थःथःगु बिचाः तयादीगु खः ।

उगु हे ज्याझ्वलय् रविन्द्रराज ताम्रकारं च्वयादीगु सफू ‘संस्कृति, समाज व व्यवसाय’या विमोचन नं जूगु खः ।

लिसें, ज्याझ्वलय् लहना मिडियां नेपाः टिभिं न्ह्याकेत्यंगु प्यंगू ज्याझ्वःया नं घोषणा याःगु खः ।

लहना मिडियां नेपाः टिभिइ समाचारमूलक ज्याझ्वः ‘लहना गतिविधि’, साहित्यिक ज्याझ्वः ‘लहना साहित्य’, मनोरन्जनात्मक ज्याझ्वः ‘लहना संगीत दबू’ व ‘लहना खँल्हाबल्हा’ ज्याझ्वः न्ह्याकेत्यंगु दु ।

लहना मिडियाया व्यवस्थापक सुरेन्द्रभक्त श्रेष्ठं थुगु ज्याझ्वः याकनं हे न्ह्यायेत्यंगु जानकारी बियादिल ।

नापं लहना मिडिया र कन्फराक्टीभ मिडियां मंकाः रुपं ग्वसाः ग्वयेत्यंगु लहनाएक्टीभ म्यूजिक भिडियो अवार्डया घोषणा नं उगु हे ज्याझ्वलय् याःगु खः ।

लहना मिडियाया नायःलिसें लहना वाःपौया प्रधान सम्पादक नृपेन्द्रलाल श्रेष्ठं नेपाल सम्वत ११४४ व ११४५य् पिदंगु नेवाः म्यूजिक भिडियो दथुइ थीथी विधाय् अवार्ड लःल्हानां उगु ज्याझ्वः जुइत्यंगु जानकारी बियादिल । अवार्डया नितिं दुतिना याकनं हे चालीगु श्रेष्ठं धयादिल ।

ज्याझ्वलय् थीथी गायक, गायिका कलाकारपिन्सं म्येलिसें हुलाप्याखं व वाद्यवादन न्ह्यब्वयादीगु खः ।