नेपाल उड इन्टरनेशनल एक्स्पो व नेपाल इन्टरनेशनल फर्निचर एन्ड होम डेकोर इन्टरनेशनल एक्स्पो जुइगु जूगु दु ।

मिडिया स्पेस सोलुसन्स प्रा.लि. व फ्युचरेक्स ट्रेड फेयर एण्ड ईभेन्टस् प्रा. लि या मंकाः ग्वसालय् वइगु पौष २० गतेनिसें २२ गतेतक एक्स्पो जुइत्यंगु खः ।

एक्स्पोय् फर्निचर, प्लाइवुड, ल्यामिनेट, हार्डवेयर, सिँ सम्बन्धि मेसिनरी व औजार, फर्निसिङ, म्याट्रेस, कच्चा पदार्थ व उत्पादन सम्बन्धि बृहत अन्तर्राष्ट्रिय ब्वज्या भृकृटीमण्डपय् जुइत्यंगु खः ।

ब्वज्याय् स्वदेशी व बिदेशी नांजाःगु ब्राण्डतय् सछि स्वयां अप्वः स्टल दइगु धाःगु दु । फनिर्चर, प्लाइउड व सिँ औजारया कम्पनी, थीथी कम्पनीया डिलर, सबडिलर व बिक्रेतातयसं सिँ ब्यबसायलिसे सम्बन्धित उत्पादनया बारे जानकारी बीगु आयोजकं धाःगु दु ।

थ्व ख्यलय् वइगु न्हून्हूगु प्रविधिया बारे जानकारी याकेत थ्व ब्वज्या वंगु ८ दँ न्ह्यःनिसें ईल्वहँ सावित जुयावःगु आयोजकया दाबी दु । आयोजकं ब्वज्यायात नेपाली बजारय् नं अत्याधुनिक वस्तु व टेक्नोलोजीयात स्वदेशी उद्योगय् छ्यलेत छगू पहलया रुपं काःगु दु ।

थ्व ब्वज्या चीधंगुनिसें तःधंगु उद्योगतकयात थम्हं छ्यलाच्वनागु मेसिनयात उन्नयन यासें अझ प्रभावकारी दयेकेत ग्वहालि जुइगु आयोजकं धाःगु दु ।

नेपालय् आः जुयाच्वंगु सिँ व फनिर्चर क्षेत्रया विकास व आधुनिकीकरणय् तिबः बीगुलिसें नेपालय् जुयाच्वगु सिँया उत्पादन सम्बन्धि ज्याय् नं थुकिं सकारात्मक भुमिका निर्वाह याइगु आयोजकया विश्वास दु ।

प्रदर्शनीइ नेपालया दिग्गज आर्कीटेक्ट, इन्जीनीयर्स व इन्टीरीयर डिजाइनरतय् ब्वति दइ ।

प्रदर्शनीं नेपालया सिँ व फर्निचर क्षेत्रय् न्हू प्रविधिया सामान दुकायेगुलिसें विदेशय् सुथांलाक छ्यःगु न्हू प्रविधियात नेपाली बजारय् अःपुक उपलब्ध याकेत छगू माध्यम जुइगु धाःगु दु ।