औषधोपचार, स्वास्थोपचार व फार्मेसीलिसे सम्बन्धित प्रदर्शनी “नेपाल फर्मा एन्ड हेल्थ अन्तर्राष्ट्रिय प्रदर्शनी” येँय् जुइगु जूगु दु ।

वइगु पुस ५ निसेँ ७ गतेतक्क येँया भृकुटीमण्डपय् प्रदर्शनी जुइत्यंगु खः । जुन मिडिया स्पेस सोलुसन्सया लिसें एक्जिबिसन एन्ड ट्रेड सर्भिसेस इन्डिया प्रा. लि. व फ्युचरेक्स ट्रेड फेयर्स एन्ड इभेन्ट्स् प्रा. लि. या संयोजकत्वय् प्रदर्शनी जुइत्यंगु खः ।

प्रर्दशनीइ स्वदेशी व विदेशी यानाः १०० स्वयां अप्वः कम्पनीतय्‌गु स्टल दइगु ग्वसाःखलकं धाःगु दु । प्रदर्शनीइ प्रदर्शनी, सम्मेलन व साझेदारी लिसेंया विशेषता छथासय् हयाः नेपाःया फर्मा व हेल्थकेयर उद्योगयात स्वायेत, सम्बन्ध दयेकेत व व्यापारया अवसर थकाय्‌त थ्व प्रदर्शनीं भूमिका म्हितीगु दावी ग्वसाःखलःयागु दु ।

‘नेपाली चिकित्सा प्रणालीइ वैदेशिक योगदान व लगानीया नितिं थीथी उत्कृष्ट ह्वःताः ब्वलंकेत नं थ्व प्रदर्शनीं न्ह्यथनेबहःगु भूमिका निर्वाह याइ’ ग्वसाःखलकं जारी याःगु प्रेश विज्ञप्तीइ च्वयातःगु दु ।

प्रदर्शनीइ न्हूगु आविष्कारत व न्हूगु बजार मालाः नेपाःया चिकित्सा व प्रयोगशाला उद्योगयात न्हूगु जाः बीगु विश्वास ग्वसाःखलकं काःगु दु ।

प्रदर्शनी स्वःवइपिनिगु नितिं प्रवेश निःशुल्कया व्यवस्था याःगु दु ।