फिल्म धयाकथं अप्वःसिनं फिचर फिल्म अथवा धाये, ताःहाकःगु फिक्सन फिल्म हे थुइका काइ ।

तर छगू म्यूजिक भिडियो नं फिल्म खः, थुकियात नं फिक्सन फिल्म कथं हे न्ह्यब्वयेफइ धकाः संकिपाकःमितयसं धायेगु याः । थ्व हे खँय् फिल्मकःमितय् दथुइ वहस नं जुयाच्वं ।

थ्व हे खँया झ्वलय् छपु न्हूगु नेवाः म्यूजिक भिडियो पिदंगु दु । म्येहालामि सुरेन्द्र श्रेष्ठं हालादीगु नेवाः म्ये ‘छन्त लुमंला’ शनिबाः सार्वजनिक जूगु खः ।

भ्यालेन्टाइन डेया दिनस किपुलिइ जूगु ज्याझ्वलय् सुरेन्द्र श्रेष्ठं लसय् हनां हालादीगु थुगु म्येया म्यूजिक भिडियो सार्वजनिक जूगु खः ।

थुगु म्यूजिक भिडियोया निर्देशकलिसें छायाङ्कार व दृश्य सम्पादक रजिन महर्जनं थुगु म्यूजिक भिडियोयात म्यूजिकल फिल्म धयादीगु दु ।

‘स्तरीय बांलाःगु म्यूजिक भिडियो दयेके धकाः बाखं, स्क्रीप्ट, डिओपी दक्वलिइ उलि हे ज्या यानागु दु । ५/६ मिनेटया म्ये स्वयेबलय् छगू फिचर फिल्म स्वयाति स्वकुमियात तायेमा धइगु जिगु कन्सेप्ट खः’ निर्देशक महर्जनया धापू खः ।

म्यूजिक भिडियो प्रिमियरय् उपस्थित स्वकुमिपिन्सं नं ६ मिनेटया भिडियो स्वयेबलय् छगू वियोगान्त संकिपा स्वयाथें जूगु प्रतिक्रिया ब्यूगु दु ।

म्येहालामि कविता जोशीं म्ये स्वयाच्वँच्वं मिखा प्यानावःगु हे मचाःगु धयादिल ।

‘फिचर फिल्म हे स्वयाच्वना थें जुल, ६ मिनेटया म्ये नं । म्ये स्वयाच्वँच्वं अथें हे मिखा प्यानावःगु चा हे मचाः का’ जोशीं धयादिल ।

म्यूजिक भिडियोया बाखनय् छम्ह ज्याथःम्ह मिजं फ्ल्यासब्याकय् वनां थः मचाबलयनिसेंया यःम्ह यज्जुलिसेया मतिना व थः यज्जुलिसे बायेमाःगु परिस्थिती लुमंकीगु क्यनातःगु दु ।

म्यूजिक भिडियोया छम्ह कलाकार लक्ष्मी कुमार महर्जनं म्येया प्रतिक्रिया न्यनां थःगु टिमया मेहनत सफल जूगु थें तायाच्वंगु धयादिल ।

‘भिडियो बांलायेमा धइगु ल्याखं सकसिगु उलि हे मेहनत दु । सकसिनं ययेकादीगु खनेदत, जिपिं लयताः’ कलाकार महर्जनं धयादिल ।

म्यूजिक भिडियोस देबेन्द्र महर्जन व अमिता महर्जन मुख्य कलाकारया रुपं दुसा मेपि यक्व हे सह व बाल कलाकारया भूमिका दयाच्वंगु दु । म्येया रचना श्याम तमोटं याननादीगु दु ।

म्यूजिक भिडियो प्रिमियर ज्याझ्वलय् म्येहालामि रामेश श्रेष्ठ, जुजुकाजी रंजित, वरिष्ठ कलाकार आशाकाजी थकु, ल्यायम्ह कलाकार मनोज महर्जनलिसें नं थःथःगु नुगःखँ तयादीगु दु ।

थुगु म्ये YGG Studio युट्युब च्यानलय् रिलिज जुइधुंकूगु दु ।