लकस नेपालया न्हूगु कार्यकालया नेतृत्व संचारकःमि लिसें म्येहालामि कलाकार सुरजबीर बज्राचार्यं यानादीगु जूगु दु ।

लकस नेपालया न्याक्वःगु अधिवेशनं संचारकःमि बज्राचार्यया नेतृत्वय् ९ दुजःया ज्यासना पुचः निर्विरोध ल्यःगु दु ।

नवनिर्वाचित ज्यासना पुचःया न्वकू पदय् ज्ञानीशोभा महर्जन, छ्यान्जेय् धर्मकृष्ण सिँकःमि व दांभरिं पदय् रश्मिला शाक्य चयन जूगु दु ।

दुजलय् रमा तुलाधर बज्राचार्य, सुरेन्द्रमान शाक्य (शाक्य सुरेन), राज्यलक्ष्मी बज्राचार्य, कुमारी तण्डुकार, झवेन्द्रप्रकाश भट्टराई दु ।

ज्यासना पुचः निर्विरोध निर्वाचित जूगु घोषणा धुंकाः संस्थाया कानूनी सल्लाहकार व निर्वाचन कमिटी कजि किरण शाक्यं नवनिर्वाचित ज्यासना पुचःयात शपथ ग्रहण याकादीगु खः ।

वयां न्ह्यः अधिवेशनया उलेज्या समारोहस सगरमाथा सामुदायिक सिकाई केन्द्रया नायः रामबहादुर के.सी.यात लकस नेपाल दँ मनू २०८२ सम्मानं सम्मानित याःगु खः ।

श्री नवजागरण युवा क्लब, पहाडे थापागाउँ व फर्सिडोल टोल विकास संस्थायात संस्थागत सम्मान याःगु खः ।

लकस नेपालं अमेरिकी संस्था आउटरिच इन्टरनेशनलया ग्वाहालिइ न्ह्याकूगु सहभागितामूलक मानव विकास ज्याझ्वः अन्तर्गत दुगु कार्यक्षेत्रं प्रक्रियागत रुपं ल्ययाः लकस नेपाल दँ मनू सम्मान बीगु यानागु धाःगु दु ।

संस्थां सहभागितामूलक मानव विकास ज्याझ्वः अन्तर्गत पहाडे थापागाउँ, सिखर्पा र कोञ्ज्योसोम गाउँपालिकाया तल्लो नल्लुया ज्याझ्वः यायेधुंकूगु दु ।

आः गोदावरी नगरपालिका वडा ४ बडिखेलय् ठूलो खोला आमा समूह, वनदेवी टोल विकास संस्था, वडा नं. ६ लप्सेय् लप्से टोल विकास संस्था, वडा ९ इताहिटीइ इताहिटी टोल विकास संस्था, बागमती गाउँपालिका वडा ३ भट्टेडाँडाय् सातकन्या सामुदायिक समूह, यल महानगरपालिका २२ वडा फर्सिडोलय् फर्सिडोल टोल विकास संस्थालिसेंया पुचःया ब्वतिइ ज्याझ्वः जुयाच्वंगु दु ।

लिसें कल्चरल सर्भाइभरया किपर्स अफ द अर्थ फण्डया ग्वाहालिइ नेपालभाषा व लिपि प्रवद्र्धन परियोजना न्ह्यानाच्वंगु दु । थुगु परियोजना अन्तर्गत नेपालभाषा, प्रचलित नेपाल लिपि व रञ्जना लिपि कक्षा न्ह्यानाच्वंगु दु ।