Apexcoder  tech

खुसि मापदण्डविरुद्ध सकलें छधी जुइमाःगुलिइ बः

eBukhan – ईबुखँ डेस्क,    २०८१ मङ्सिर ४, मंगलबार    वर्गीकृत राष्ट्रिय

खुसि मापदण्ड सम्वन्धि सर्वोच्च अदालतया आदेशविरुद्ध सकलें छधी जुयाः न्ह्याःवनेमाःगुलिइ सरोकारवालातयसं बः ब्यूगु दु ।

शनिबाः भूमि अधिकार संरक्षण संघर्ष समितिं येँय् याःगु जातीय खलःपुचःलिसेया सहलह ज्याझ्वःया वक्तातयसं थथे बः ब्यूगु खः ।

ज्याझ्वलय् वक्तातयसं थीथी विकासे योजना व मापदण्डया नामय् राज्यं स्वनिगःया आदिवासी व रैथानेतय् बाय् लाकाकायेत स्वयाच्वंगु दावी याःगु खः ।

समितिया कजि श्यामकृष्ण प्रजापतिं राज्यं भूमिहीनयात भूमिपति दयेकेगु खँ ल्हानाच्वंबलय् थनया आदिवासी, रैथाने समुदाययात खुसि मापदण्डया नामय् भूमिहीन दयेकेत स्वःगु धयादिल ।

राष्ट्रिय भूमि आयोग येँ जिल्ला समितिया नायः तकं जुइधुंकूम्ह कजि प्रजापतिं संविधानं ब्यूगु नीजि सम्पत्ति व भूमिया अधिकार राज्यं छुं नं हालतय् लाका कायेमदइगु धयादिल ।

‘थीथी विकासे योजना, मापदण्डया नामय् जनताया संवैधानिक सम्पत्तिया हकलिसें भूमि व संस्कृति तकं लाकाकायेत स्वयाच्वंगु दु । सम्पत्ति व आवासया संवैधानिक हक अःखः वःगु थ्व मापदण्डविरुद्ध झी सकलें छधी जुयाः दने हे माः’ प्रजापतिं धयादिल ।

५० दँ स्वयां अप्वः न्ह्यःया नापनक्साया आधारये आः जनताया छेँ थुंवये ज्यूला धइगु न्ह्यसः नं प्रजापतिं तयादिल ।

‘ईकथं अध्ययन अनुसन्धान छुं नं मयाःसे २१ सालया नापनक्सायात आः आधार नालेगु सान्दर्भिक जुइला ? आः रावल आयोगया प्रतिवेदन गुलितक सान्दर्भिक जू ? मापदण्ड दयेकेत ईकथं अध्ययन यायेमाली जुइनि’ प्रजापतिया न्ह्यसः खः ।

उगु हे ज्याझ्वलय् उपस्थित कानून व्यवसायीतयसं संविधानं ब्यूगु नीजि सम्पत्ति व आवासया हक अःखः खुसि मापदण्ड वःगु बिचाः तःगु खः ।

सहलह ज्याझ्वलय् स्यस्यः समाज, तण्डुकार समाज, रजक समाज, शिख्राकार समाज, राजोपाध्याय समाज, ज्यापु महागुथि केन्द्र, ज्यापु महागुथि काठमाडौं महानगर समिति, ताम्राकार समाज, यल नेवाः समाजपाखें नायः, प्रतिनिधितय् ब्वति दुगु खः ।

ज्याझ्वःया सहभागीतयसं जनतां विरोध यानाच्वंगु खुसि मापदण्डया हे नामय् येँ महानगरपालिकां अदालतं निषेधाज्ञा जारी यानातःगु छेँयात डोजरं थुंगु खँया भत्सर्ना याःगु दु ।

येँ महानगरपालिकां जनतालिसे समन्वय यानावनेमाःगुलिइ अःखतं झन दमन यायेत स्वःसा सशक्त विरोधय् कुहांवयेत थःपिं बाध्य जुइगु खँ ज्याझ्वःया ब्वतिमितयसं धाःगु खः ।