नेपाल पत्रकार महासंघं समाचार संकलन यानाच्वंम्ह पत्रकारयात येँ महानगर प्रहरीं आक्रमण याःगु दावी याःगु दु ।

महासंघं विज्ञप्ती जारी यासें समाचार संकलन यायेत सुन्धारा थ्यंम्ह महासंघ प्यूठान शाखाया दुजः पदमप्रसाद पोख्रेलयात नगर प्रहरीं आक्रमण याःगुलिइ ध्यानाकर्षण जूगु धाःगु खः ।

महासंघया महासचिव रोशन पुरीया ल्हाःचिं दुगु विज्ञप्तीइ फागुन १६ गते येँया सुन्धाराय् सडक व्यापारीयात लिनाछ्वःबलय् भिडियो कयाच्वंगु अवस्थाय् पत्रकार पोखरेलयात नगर प्रहरीं आक्रमण याःगु धाःगु दु ।

पत्रकार म्हसीका क्यनं नं नगर प्रहरीं पत्रकार पोखरेलया मोबाइल फोन, क्यामेरा ल्यापटप, व मेगु भ्वं नं जफत याःगु महासंघया विज्ञप्तीइ धयातःगु दु ।

‘महासंघ प्यूठान शाखाया कथं फागुन १६ गते बुधबाः सनिलय् येँया सुन्धाराय् महानगर प्रहरीं सडक व्यापारीतयत बलपूर्वक चीकाच्वंगु खः । व हे विषयया भिडियो कयाच्वंगु अवस्थाय् पत्रकार म्हसीका पौ क्यनं नं नगर प्रहरीं आक्रमण यानाः पत्रकार पोख्रेलया मोबाइलफोन, क्यामेरा, ल्यापटप, व मेगु भ्वत जफत याःगु शाखां न्ह्यथंगु दु’ विज्ञप्तीइ च्वयातःगु दु ।

नागरिकयात सुसूचित यायेगु जिम्मेवारी बहन याइम्ह पत्रकारयात नगर प्रहरीं याःगु हर्कत तसकं निन्दनीय व प्रेस स्वतन्त्रताय् ज्यादती जूगु महासंघया ठहर दु ।

घटनाय् संलग्न नगर प्रहरीयात कारवाहीया दायराय् हयेगुलिसें आवंलि थज्याःगु घटना जूइकेमबीत माःकथंया पलाः ल्ह्वनेत महासंघं माग याःगु दु । लिसें जफत याःगु पत्रकार पोख्रेलया सामग्री लित बीत नं महासंघं माग याःगु दु ।