दि ओरिएण्टल इन्स्योरेन्स कम्पनी लिमिटेडं जाजरकोट भुखाय् पिडिततय् लागिं १० लख ग्वहालि ब्यूगु दु ।

कम्पनीं जाजरकोट भुखाय् पिडितया ग्वहालिया लागिं प्रधानमन्त्री दैवी प्रकोप सहायता कोषय् १० लख तयाब्यूगु खः ।

कम्पनीया सामाजिक उत्तरदायित्व अन्र्तगत २० लख तका आर्थिक ग्वहालि ब्यूगुलिइ जाजरकोट भुखाय् पिडितया लागिं १० लख ग्वहालि उपलब्ध याकूगु खः ।

मेगु झिगू लख धाःसा स्कुले बिद्याार्थीतय् लागिं समता शैक्षिक गुठीयात उपलब्ध याकूगु दु ।

कम्पनीया केन्द्रिय ज्याकू न्हू दिल्लीं वःम्ह कम्पनीया नायः लिसें प्रवन्ध निर्देशक आर.आर.सिंह, महाप्रवन्धक रेखा मोहन्ती ठाकुर, कम्पनीया नेपालस्थित ज्याकूया प्रमूख कार्यकारी अधिकृत टी. चक्रवर्तीं उगु रकम बराबरया चेक लःल्हानादिल ।

फाल्गुन २२ निसें २४ गतेतक नेपाल ज्याकू भ्रमणय् वःपिं कम्पनीया नायः लिसें प्रवन्ध निर्देशकनापं उच्च पदस्थ पदाधिकारीतय् भ्रमणया मू आज्जु नेपालय् बीमा व्यवसायया विकास, विस्तार व सामाजिक उत्तरदायित्वय् योगदान बीगु धाःगु दु ।

भ्रमणया झ्वलय् प्रवन्ध निर्देशक सिंहं कम्पनीं बजारय् हःगु ल्यायम्ह पुस्ता लक्षित न्हूगु बिमालेख ‘Oriental Youth Eco Care Policy’ या बिक्रीया शुभारम्भ नं यानादीगु खः ।

दि ओरिएण्टल इन्स्योरेन्स कम्पनी लिमिटेड, न्हू दिल्लीया कचा ज्याकूया रुपं नेपालय् बि.स. २०२४य् स्थापना जूगु खः ।