अमर चित्रकार व सरीता महर्जनं हालातःगु म्ये ‘छंगु ल्यू ल्यू वयाः’ या म्यूजिक भिडियो सार्वजनिक जूगु दु ।

शनिबाः येँय् जूगु छगू ज्याझ्वलय् थुगु म्येया म्यूजिक भिडियो सार्वजनिक जूगु खः ।

ख्यालि जुजु मदनकृष्ण श्रेष्ठया उपस्थितीइ जूगु ज्याझ्वलय् उगु म्यूजिक भिडियोया प्रिमियर याःगु खः ।

ज्याझ्वलय् न्ववासें ख्यालि जुजु श्रेष्ठं नेवाः संगीत ख्यलय् मदिक्क हे न्हून्हूगु म्ये पिहांवयाच्वंगुलिइ लसता प्वंकादिल ।

सार्वजनिक जूगु म्ये ‘छंगु ल्यू ल्यू वयाः’ यात भुपेन्द्र बज्राचार्यं संगीत बियादीगु दुसा थुगु म्ये हालादीम्ह अमर चित्रकारं हे च्वयेगुया लिसें छायाङ्कन व दृश्य सम्पादन तकं यानादीगु दु ।

थःगु नुगःखँ तयेगु झ्वलय् चित्रकारं १७ दँया दिपाः धुंकाः थम्हं हालागु म्ये पिदनाच्वंबलय् थः तसकं लयताःगु धयादिल ।

‘न्हापा ला जिं म्ये हालेगु हे यानाच्वनागु खः, दथुइ छायाङ्कनपाखे जक लात । आः १७ दँ लिपा हाकनं थम्हं हालागु म्ये पिदनाच्वंबलय् तसकं न्ह्यइपुसे च्वनाच्वंगु दु’ चित्रकारं धयादिल ।

नुगःखँया झ्वलय् वयकलं म्येया छायाङ्कनया झ्वलयया अनुभव नं न्यंकादीगु खः ।

मेम्ह म्येहालामि सरिता महर्जनं थम्हं फुकथं नेवाः संगीत ख्यलय् तिबः बी धकाः न्ह्यज्यानाच्वनागु व फक्व याना हे च्वनेगु धयादिल ।

म्यूजिक भिडियो निर्देशक रवि सायमिं सकल नेवाः समुदाययात नेवाः संकिपा ख्यःयात मतिना व तिबः बीत इनाप यानादिल ।

ख्यालि पहलं दयेकातःगु म्यूजिक भिडियोलय् थौंकन्हयया लोकंह्वाःम्ह कलाकार जोडी मनोज महर्जन व नेरिशा महर्जनं अभिनय यानादीगु दुसा कोरियोग्राफी कृष्णभक्त महर्जनं यानादीगु दु ।

म्येय् स्वनिगःया थीथी थायया मौलिक नां न्ह्यब्वयातःगु दु ।  म्ये आरबि म्यूजिक नेपाल युट्युब च्यानलमार्फत सार्वजनिक जूगु दु ।