केन्द्रीय मानन्धर संघं देय्‌न्यंकया मानन्धर समुदाययात कःघाना स्वयम्भू भ्वय् ज्याझ्वः नापं थःगु ७१औ बुसादँ हंगु दु ।

ज्याझ्वलय् समुदाय दुनेया जनप्रतिनिधि, भिमरथारोहण यायेधुंकपिं ज्येष्ठ नागरिक, कासामि, न्हूपिं त्यपुनापं थीथी संकायय् विद्यावारिधी याःपिन्त सम्मान याःगु खः ।

वहे झ्वलय् भ्वतया मोहनलाल खिं मानन्धरया लुमन्तिइ स्थापना याःगु ५०द्वः तकालिसेंया सिरपाः डा। भगवानदास मानन्धरयात ब्यूगु खः ।

नेपाल संवतयात प्रविधिनाप स्वायेगु नितिं योगदान ब्यूगु धासें वय्‌कःयात पुरस्कृत यानागु धाःगु दु ।

अथेहे, फंपिया हरिशंखर जात्रा न्ह्याकाच्वंम्ह दक्षिणकाली नगरपालिकाया सुरेन्द्र मानन्धरयात २५द्वः तकालिसेंया सिरपा ब्यूगु खः ।

अथेहे, खुगू दशक स्वयां अप्वः इलंनिसें स्वास्थ्य सेवा बियावःगु क्षेत्रपाटी निःशुल्क चिकित्सालययात ५०द्वः तकालिसेंया बेखा नारायण देव कुमारी राष्ट्रिय प्रतिभा सिरपाः ब्यूगु खः ।

प्रा. रामभक्त–सानुनानी मानन्धरया नामं नीस्वनातःगु सिरपा थीथी विधाय् विद्यावारिधी याःपिं डा. राजु, डा. राजभाइ व डा. विनिता मानन्धरयात लःल्हाःगु खः ।

अथेहे द्वारिका नारायण–हिरादेवीया नामं स्थापित सलिंचा मचा नेवाः पुरस्कार विद्यार्थीद्वय संवीद व रोनिमा मानन्धरयात लःल्हात ।

मानविकी संकाय अन्तर्गत स्नातकोत्तर तगिं नेपालभाषा विषयय् उत्कृष्ट जूम्ह अनिल स्थापितयात सत्यतारा सम्मान ब्यूगु दु ।

अथेहे, एमबीबीएस, एमडी, प्लस टु, एमए, कम्प्युटर साइन्स, बीई, बीबीए, एसईई तहय् उत्कृष्ट जुपिं विद्यार्थीतय्‌त नं पुरस्कृत याःगु खः ।

विपन्न अभिभावकया पहिचान यानाः समुदाय दुनेया निम्ह विद्यार्थीतय्‌त छात्रवृत्ति नं लःल्हाःगु खः ।

ज्याझ्वलय् बागमती प्रदेशया सांसद व पूर्वमन्त्री माननीय बसन्त मानन्धर, येँ महानगरपालिकाया प्रवक्ता १७ वडाध्यक्ष नवीन मानन्धर, थीथी स्थानीय तहया जनप्रतिनिधित, काठमाडौं उपत्यका लिसें देय्‌या थीथी थासं व त्वाःया प्रतिनिधि मानन्धरतय्‌गु ब्वति दूगु खः ।

भ्वय्‌लिसें हिदान, हस्तकला व घरेलु अचारया स्टल, बैंक व वित्तीय संस्थातय्‌गु स्टल तकं दूगु खः ।

नेपाल रेडक्रस सोसाइटी गणबहाल कचालिसे समन्वय यानाः हिदान ज्याझ्वः तयागु हिदान ज्याझ्वःया कजि व संघया सह सचिव कृष्ण बहादुर मानन्धरं धयादिल ।

स्वयम्भू लागाय् चैत्य पलिस्था जूगु लुमन्तिइ हनाच्वंगु परम्परागत भ्वय् ज्याझ्वलय् लिपांगु इलय् औपचारिक, सांस्कृतिक ज्याझ्वःलिसें आर्थिक क्षेत्र प्रवर्ध्दननाप नं स्वानायंकागु संघया धापू दु ।

द्वलंद्वःया ल्याखय् सहभागी जुइपिं मानन्धरतय्‌त भ्वय् नकेगु जिम्मेवारी थुगुसी येँया वंगःस्थित बाका देय् वटु सनाः खलकं काःगु खः ।

आकिवंया नितिं न्यूरोड पाक्व पुखूद्यां मानन्धर सनाः खलःयात भ्वय्‌या व्यवस्थापनया जिम्मेवारी ब्यूगु दु ।

सुरुइ दैसाः त्वालं व्यवस्थापन यानाच्वंगु स्वयम्भू भ्वजय् चालिसया दशकनिसें मेगु त्वालं नं सहकार्य यानाहःगु खः ।