प्रहरीया अनुसन्धान प्रक्रियाय् सिसिटिभि क्यामेरा प्रभावकारी सावित जुयावंगु दाबी प्रहरीं याःगु दु । न्हिथं जुइगु घटनाया निगरानी व जुइधुंकूगु घटनाया फुटेज पहिचान यानाः विश्लेषणं अनुसन्धानय् ग्वहालि जूगु प्रहरीं धाःगु दु ।

सिसिटिभि मोनिटरिङ कक्षं न्हिथंया ट्राफिक चापया व्यवस्थापन लिसें जुलुस, सभा व सम्मेलनय् हुलदङ्गा याइगु पुचःयात निगरानीया ज्या नं जुइ ।

नेपाल प्रहरीया केन्द्रीय प्रहरी प्रवक्ता प्रहरी नायव महानिरीक्षक भिम प्रसाद ढकालं समाजय् शान्ति सुरक्षा कायम यायेत, सवारी दुर्घटना न्यूनीकरण व दुर्घटना जूसा संलग्नयात म्हसीकेगु लिसें कारवाही यायेत सिसिटिभि प्रभावकारी माध्यम जूगु धयादी ।

‘थुकिं आपराधिक क्रियाकलाप न्यूनीकरण व नियन्त्रण यायेत, प्रहरी परिचालनयात सहज व प्रभावकारी दयेकेत ग्वहालि याः । अथेजुयाः प्रहरी संगठनं सिसिटिभि प्रयोगयात उच्च प्राथमिकताय् तःगु दु’ प्रहरी नायव महानिरिक्षक ढकालया धापू खः ।

नेपाल प्रहरीया कथं वंगु साउननिसें माघतकया न्हयलाया इलय् देय्न्यंक द्वःछि, २९५ थप सिसिटिभी जडान जूगु दु ।

वमध्ये काठमाडौं उपत्यका प्रहरी कार्यालय अन्तर्गत २६१, कोशी प्रदेश प्रहरी ज्याकू अन्तर्गत ३९०, मधेश प्रदेश प्रहरी ज्याकू अन्तर्गत ७० व बागमती प्रदेश प्रहरी ज्याकू अन्तर्गत १२६ क्यामेरा जडान जूगु दु ।

अथेहे, गण्डकी प्रदेश प्रहरी ज्याकू अन्तर्गत १६२, लुम्बिनी प्रदेश प्रहरी ज्याकू अन्तर्गत १०३, कर्णाली प्रदेश प्रहरी ज्याकू अन्तर्गत ९४ व सुदूरपश्चिम प्रदेश प्रहरी ज्याकू अन्तर्गत ८९ सिसिटीभि क्यामेरा जडान जूगु दु ।

आःतक देयन्यंक नेपाल प्रहरीं मोनिटर याइगु सिसिटिभिया ल्याः १३द्वः व ६७५ थ्यनेधुंकूगु दु ।

वमध्ये काठमाडौं उपत्यका प्रहरी ज्याकू अन्तर्गत स्वद्वः व ९९३, कोशी प्रदेश प्रहरी ज्याकू अन्तर्गत निद्वः व ४५८, मधेश प्रदेश प्रहरी ज्याकू अन्तर्गत द्वःछि व ५३२, बागमती प्रदेश प्रहरी ज्याकू अन्तर्गत द्वःछि व ३६८ क्यामेरा दु ।

सूचना व प्रविधिया प्रणाली प्रभावकारी दयेकाः उकिया उपयोगं गुणात्मक लिच्वः चूलाकेत सिसिटिभी क्यामेराया भूमिका महत्वपूर्ण जू । क्यामेरा अकाट्य दसि जूगुलिं घटनालिसे सम्बन्धित मनू बिस्युंवने फइमखु

अथेहे, गण्डकी प्रदेश प्रहरी ज्याकू अन्तर्गत द्वःछि व ६५१, लुम्बिनी प्रदेश प्रहरी ज्याकू अन्तर्गत द्वःछि व ४१०, कर्णाली प्रदेश प्रहरी ज्याकू अन्तर्गत ४४८ व सुदूरपश्चिम प्रदेश प्रहरी ज्याकू अन्तर्गत ८१५ सिसिटिभि क्यामेरा दु ।

‘सूचना व प्रविधिया प्रणाली प्रभावकारी दयेकाः उकिया उपयोगं गुणात्मक लिच्वः चूलाकेत सिसिटिभी क्यामेराया भूमिका महत्वपूर्ण जू । क्यामेरा अकाट्य दसि जूगुलिं घटनालिसे सम्बन्धित मनू बिस्युंवने फइमखु’ प्रवक्ता ढकालं धयादिल ।

न्ह्यानाच्वंगु आर्थिक दँया पुसतकया खुलाया इलय् उपत्यका प्रहरी ज्याकुथिं सवारी दुर्घटना, सामान त्वःफ्यूगु/तंगु, चोरी, लुटपाट, सवारी साधन तंगु, मनू तंगु लिसें मेगु थीथी घटनाय् मुक्कं द्वःछि व २९७ फुटेज माग जूगुलिइ ५८१ फुटेज उपलब्ध याकागु जानकारी नेपाल प्रहरीं ब्यूगु दु ।

व हे फुटेजया लिधंसाय् ४०९ घटना अनुसन्धान यानाः निचोडय् थ्यंकेत प्रहरी ताःलाःगु दु ।

व इलय् स्वनिगलय् ट्राफिक नियम उल्लंघन यानाः फरार १४द्वः व ६३३म्ह व ट्राफिक सपोर्ट कारबाही २५द्वः व ६३६म्ह यानाः ४०द्वः व २६९म्हेसित सिसिटिभिया लिधंसाय् पहिचान व फलोअप यानाः कारवाहीया दायराय् हयेत ताःलाःगु नेपाल प्रहरीं धाःगु दु ।

सिसिटिभि मोनिटरिङया सम्बन्धय् उपत्यका प्रहरी ज्याकू रानीपोखरी संचार तथा सिसिटिभि शाखाया प्रमुख प्रहरी उपरीक्षक दामोदर कँडेलं आधुनिक प्रविधि छ्यलाः २४ घौ हे सिसिटिभिया माध्यमं मोनिटरिङ यानाः परिणाम व प्रमाणमुखी प्रहरी ज्यायात थप व्यवस्थित दयेकेत मदिक्क जानाच्वनागु दावी यानादिल ।