अमेरिकि राष्ट्रपति जो बाइडेनं आधिकारिक रुपय् थःगु टिकटक एकाउन्ट न्ह्याकूगु दु ।

नोभेम्बर २०२४ य् जुइत्यंगु राष्ट्राध्यक्षया निर्वाचनय् निगूगु कार्यकाल नं निर्वाचित जुइगु लक्ष्य कयाच्वंम्ह बाइडेनं टिकटकय् एकाउन्ट दयेकाः चर्चाय् नं वःगु दुसा आलोचित नं जुयाच्वंगु दु ।

नेपालय् सामाजिक सद्भाव स्यंकूगु धासें टिकटकय् प्रतिवन्ध तयेधुंकूगु दु । अथेहे जःलाखला देय् भारतय् नं राष्ट्रिय स्वाधिनताय् न्ह्यसःचिं दंगु धासें टिकटकय् बन्देज तयातःगु दु ।

चाइना देशं न्ह्यानाच्वंगु थ्वहे टिकटक अमेरिकाय् नं बन्द जुइमाःगु सः थ्वयाच्वंगु हे इयल् राष्ट्रपति बाइडेन थम्हं हे टिकटक अकाउन्ट दयेकेधुंकाः आलोचित जुयाच्वंगु  खः ।

चुनावी अभियान ल्याय्म्हतयगु दथुइ थ्यंकेगु लक्ष्य कयाः बाइडेनं टिकटक न्ह्याकेगु निर्णय याःगु राष्ट्रपतिया चुनावी अभियान सचिवालयं न्ह्यथंगु दु ।

चुनावी अभियानया झ्वलय् सचिवालयं ‘गन मतदाता, अन नापलायेज्या’ अभियान नं न्ह्याकागु धाःगु दु, गुगु अभियानय् ‘मेटा’ यागु इन्सटाग्राम व पुर्व राष्ट्रपति नापं कट्टर प्रतिद्वन्दि डोनाल्ड ट्रम्पयागु ‘ट्रुथ सोसियल’ तकं दुथ्याः ।

टिकटक प्रयोग सरकारि मोबाइलं जुइमखुगु व सुरक्षा सतर्कताय् छु नं कसर ल्यं मतयेगु नं सचिवालयया धापू दु ।

थगुने बाइडेन सरकारं सम्पुर्ण सरकारी निकाययात सरकारि मोबाइलजन्य उपकरणं टिकटक हटे यायेत उजं ब्यूगु खः व आःतक्क नं टिकटकलिसे सम्बन्धित सुचना–सुरक्षाया विषय अमेरिकी सदनय् विचाराधीन अवस्थाय् दु ।