थाइल्याण्डया ’इन्टरनेसनल बेलुन फियस्ता’य् बेलुन नेपालया ब्वति
eBukhan – बि. आर. भाराे, २०८० फाल्गुण ७, सोमबार वर्गीकृत अर्थ
हट एयर बेलुन ब्वयेकावःगु नेपालया छगू जक कम्पनी बेलुन नेपालं थाइल्याण्डय् जूगु ’इन्टरनेसनल बेलुन फियस्ता २०२४’य् ब्वति काःगु दु ।
वंगु बुधबाःनिसें थाइल्याण्डया दकले ख्वाउँगु शहर च्याङराईय् जूगु न्यान्हुया फेस्टिभलय् नेपालया प्रतिनिधित्व यासें बेलुन नेपालया नायः बिक्रम बाडे व निर्देशक बि बि ढकालं ब्वति कयादीगु खः ।
ज्याझ्वलय् २० व्यवसायिक व ६० मिनीलिसें ८० बेलुन ब्वयेकूगु खः । गुकी नेपालया बेलुन नेपाल लिसें १२ देयया बेलुन कम्पनीया ब्वति दुगु खः ।
ज्याझ्वलय् थीथी बेलुनय् २० देयया राष्ट्रिय ध्वाँय् ब्वयेकूगु खः, गुकीमध्ये छगः बेलुनय् नेपालया राष्ट्रिय ध्वाँय् ब्वयेकागु निर्देशक ढकालं जानकारी बियादिल ।
‘देयया प्रवर्ध्दनया लागिं थज्याःगु ज्याझ्वः तसकं बांलाः खनी । नेपालय् नं बेलुन दु धइगु जानकारी बी दुगु लसताया खँ खः’ ढकालया धापू खः ।
आइतबाः क्वचाःगु ज्याझ्वलय् हरेक दिनय् थीथी कथंया धेंधें बल्लाखं जाःगु कासा जूगु खः । गुकी पर्यवेक्षकया रुपं बेलुन नेपालं भूमिका म्हितूगु खः ।
ज्याझ्वःया इलय् खटे जूपिं पाइलट व बेलुन क्रूया हनाय् आइतबाः सनिलय् बेलुन नेपालया कजिसुइ बेलिभ्वय् लिसें ’नेपाली नाइट’या ग्वसाः ग्वःगु खः । व इलय् पाइलट व क्रूतयत नेपाली ढाका तपुलि व खादां क्वखायेकाः बुद्धया प्रतिमा देछाःगु खः ।
ज्याझ्वलय् नेपालया लुम्बिनी व सिद्धार्थ गौतमबारे जानकारी नं बियागु ढकालं धयादिल ।
‘यक्वसित बुद्ध इण्डियाय् बूगु धइगु भ्रम दुगु जुयाच्वन तर, थ्व फेस्टय् छगू लखत्यातकया कन्सर्टय् ब्वति दुगु खः । अन लुम्बिनी नेपालया व बुद्धया जन्म नेपालय् जूगु जानकारी बी खन’ ढकालया धापू खः ।
लिसें नेपालय् नं अज्याःगु हे कथंया ज्याझ्वः तयाः थीथी देयया पर्यटकत दुकायेगु बिचालय् दुगु नं वयकलं धयादिल ।
थाइल्याण्डया फ्लाइङ मिडियां ग्वसाः ग्वःगु ज्याझ्वलय् स्थानीय सांस्कृतिक न्ह्यब्वया न्ह्यब्वःगु खः । ज्याझ्वःया न्यान्हुया इलय् मुक्कं १० लखम्हेसिनं अवलोकन याःगु खः ।