वरिष्ठ संगीतकर्मी बुद्ध सायमि व गायिका रन्जु श्रेष्ठं हालातःगु ‘ए मयजु छ जिगु न्ह्यलय्’ म्ये सार्वजनिक जूगु दु ।

वरिष्ठ संगीतकर्मी सायमिया हे युट्युब च्यानल अडियो नेपालय् थुगु म्येया म्यूजिक भिडियो सार्वजनिक जूगु खः । अडियो नेपाल युट्युब च्यानलमार्फत थौं सोमबाः सुथय् थुगु म्यूजिक भिडियो सार्वजनिक जूगु खः ।

बुद्ध सायमि थुज्वःम्ह वरिष्ठ संगीतकर्मीलिसे ज्वःम्ये हालेखनाः थः तसकं लयताःगु म्येहालामि रन्जुं धयादिल ।

‘बुद्ध दाईया नां ला यक्व हे न्यनावयागु खः, वयकलं संगीत तयादीगु, संयोजन यानादीगु म्ये नं यक्व हे न्यनावयागु खः । थौं वयकःलिसे हे म्ये हालेखनाः जि तसकं लयताः’ म्येहालामि रन्जुं धयादिल ।

म्यूजिक भिडियोलय् मोडलद्वय महेन्द्र खड्गी व मीरा डंगोल मुख्य कलाकारया रुपय् दुसा प्रशन्न कर्माचार्य, अमला कर्माचार्य, राम कुमार मानन्धर व बिमला मानन्धर सहायक कलाकार कथं दु ।

म्येय् कोरीयोग्राफी नं कलाकार महेन्द्र खड्गीं हे यानादीगु दु ।

म्येया छायाङ्कन गोकर्णेश्वरया पंडित गामय् यानातःगु दु । वरिष्ठ संगीतकर्मी सायमिं थुगु म्ये हालेगु जक मखसें छायाङ्कन, दृश्य सम्पादन व निर्देशन तकं यानादीगु दु ।