प्यक्वःगु नेपाल फाइभ पि अन्तर्राष्ट्रिय ब्वज्या वइगु पुस ५ गतेनिसें येँय् न्ह्याइगु जूगु दु ।

ग्वसाः खलः मिडिया स्पेस सोलुसन्स प्रा.लि र फ्युचरेक्स ट्रेड फेयर एण्ड ईभेन्टस् प्रालिं प्रेश विज्ञप्ती पिथनाः वइगु ५ गतेनिसें ७ गतेतक येँया भृकुटीमण्डपय् ब्वज्या जुइत्यंगु धाःगु खः ।

ब्वज्याय् स्वदेशी व विदेशी कम्पनीतय् १५० स्वयां अप्वः स्टलत दइगु ग्वसाः खलकं जानकारी ब्यूगु दु । प्लास्टिक, पेपर, प्रिन्टिङ्, प्याकेजिङ् व प्रोसेसिङ्लिसे स्वापू दुगु व्यापार व्यवसाययात छथाय् हयाः ब्यापार साझेदारि, नविनतम प्रविधि ब्वज्या व संवाद यायेत मंकाः दबू बीगु ब्वज्याया आज्जु खःगु धाःगु दु ।

‘सप्लायर्स व उत्पादकतयत मंकाः दबू जक मखसें नेपाल फाईभ पीं समृद्ध नेपालया रेखाङ्कनय् नं उत्तिकं योगदान बीगुलिसें हलिंन्यंकया उत्कृष्ट प्रविधि व कुतःयात दुकाइ’ ग्वसाः खलः संस्थाया दावि दु ।

थुगु ब्वज्याय् प्लास्टिक प्रोसेसिङ् मेसिनरी, स्क्रिन प्रिन्टिङ्, ईन्डक्सन मोल्डिङ् मेसिन, प्रिन्टिङ् मेसिन, अफिस स्टेशनरी मेसिनरी लिसेंया उत्पादक संस्थाया ब्वति दइगु धाःगु दु । लिसें पेपर कप मेसिनरी, दक्वं कथंया भ्वं व स्पेर पार्टस, लेबल उत्पादक, कोरुगेटेड बक्स उत्पादक लिसेंया संस्थातय् नं ब्वति दइ ।