भारतया झारखण्डय् ब्राजिलियन मोटोभ्लगरया सामूहिक बलात्कार काण्डय् संलग्न दुगु द्वपनय् आःतक्क स्वम्ह ज्वंगु दु । ज्वंपिं स्वम्हेसितं थौं अदालतय् हाजिर याकूगु खः ।

झारखण्ड प्रहरी प्रमुख अजय कुमार सिंहयात उद्धृत यासें इन्डियन एक्सप्रेसं सामूहिक बलात्कारय् संलग्न न्हय्म्हसियागु हे पहिचान जुइधुंकूगु व मेपिं प्यम्ह बिस्युंवनाच्वंपिन्त मालाच्वनागु धाःगु दु ।

‘घटनाय् संलग्न न्हय्म्ह अभियुक्तया पहिचान जुयाः स्वम्हेसित ज्वनेधुन । मेपिं प्यम्ह संदिग्धत नं याकनं हे गिरफ्तार जुइ’ इन्डियन एक्सप्रेसयात झारखण्ड प्रहरी प्रमुख सिंहं धयादिल ।

थः स्पेनिश जहानलिसे दक्षिण एशिया चाःह्यूवःम्ह छम्ह ब्राजिलियन मोटोभ्लगरयात भारतया झारखण्डय् वंगु शुक्रबाः न्हय्म्हसियागु पुचलं सामूहिक बलात्कार याःगु खः ।

श्रीलंका चाःहिले धुंकाः भारत थ्यंपिं इपिं झारखण्डया दुमका नगरय् दिनाः टेन्ट तया च्वगुं खः । वहे इलय् न्हय्म्हेसियागु पुचलं ब्राजिलियन मिसा व वय्‌कःया जहानयात नं दायाः सरसामानत लुटेयाना यंकूगु खः । मिसायात धाःसा न्हय्म्हेसिनं बलात्कार नं याःगु खः ।

‘इमिसं जितः दाल, यक्व सामानत ला लुटे याना मयंकू, छाय्‌धाःसा इमिगु उद्देश्य जितः बलात्कार यायेगु हे खत’ २८ दँया मिसां धयादिल ।

वय्‌कःया जहानयात धाःसा तसकं दाःगुलिं ख्वालय् तःधंगु घाःपाः जूगु धाःगु दु ।

भारतीय मोटोभ्लगरतपाखें घटनाया विरोध

थ्व घटनायात कयाः भारतय् सर्वत्र विरोध जुयाच्वंगु दु । विशेष यानाः भारतीय मोटोभ्लगरतय्‌सं दोषीयात कडा कारवाहीया माग यानाच्वंगु दु ।

UK07 नामं म्हस्यूम्ह भारतीय मोटोभ्लगर अनुराग दोभलं थ्व घटना मोटोभ्लगरतय्‌गु नितिं जक मखसें समग्र भारतया नितिं तसकं मछालापुस्सेच्वंगु धयादीगु दु ।

थः पिडितत लिसे दुगु धासें पिडकयात कडा कारवाही जुइमाःगु माग वय्‌कलं यानादीगु दु । अथेहे जसमिन्दर सिंहं (जे.एस. फिल्म्स) घटना जुइवं थःगु च्यानलय् भिडियो छगु अपलोड यासें  बलात्कारया घटनाय् ल्हाः दुपिन्त फक्व याकनं ज्वनाः कारवाही यायेत माग यानादीगु दु ।

भारतय् सार्वजनिक जूगु छगू तथ्याङ्क कथं भारतय् न्हिं ९० म्ह मिसात बलात्कारया शिकार जुइगु याः । थ्व तथ्याङ्कया लिधंसाय् स्वयेबलय् भारतय् प्रत्येक १८ मिनेटय् छ्म्ह मिसा बलात्कृत जुइगु याः ।

राजस्थान, उत्तर प्रदेश व मध्य प्रदेशय् बलात्कारया घटना अप्वः जुइगु याः ।