काठमाडौं सुनचाँदी व्यवसायी संघया रोहीना देवी शाक्य न्हूम्ह नायः चयन जूगु दु ।

शनिबाः येँय् क्वचाःगु संघया २१क्वःगु दँमुँज्या व न्हयक्वःगु तःमुँजयां शाक्ययात सर्वसम्मतं संघया न्हूम्ह नायः चयन याःगु खः ।

अधिवेशनं सर्वसम्मत ल्यःगु न्हूगु कार्य समितिइ उपेन्द्रकाजी शाक्य, मुक्तीरत्न वज्राचार्य व दशरत्न बज्राचार्य न्वकू जूगु दु ।

छ्यान्जेया भाला लेखरत्न शाक्ययात चूलाःबलय् रमेशमान शाक्य दांभरिं जूगु दु । अभिषेक शाक्य ल्यू छ्यान्जे व पद्मेश शाक्य ल्यू दांभरिं पदय् ल्यल ।

कार्य समिति दुजलय् सुर्यरत्न बज्राचार्य, सुरेन्द्रकाजी शाक्य, सुजेन शाक्य, निकेशरत्न बज्राचार्य, मनिष शाक्य, उजिना शाक्य, मोहिनी शाक्य, संजयरत्न शाक्य, माणिकरत्न शाक्य, रविन्द्र शाक्य, कबीरचन्द्र बज्राचार्य, सन्दिप शाक्य व अरुणा श्रेष्ठ नं निर्विरोध निर्वाचित जुल ।

थ्वयां न्ह्यः, संघया साधारण सभाया उद्घाटन सत्रय् न्ववासें युवा तथा खेलकुद मन्त्री बिराजभक्त श्रेष्ठं लिच्छवी कालनिसेंया इतिहास कुबियाच्वंगु लुँवहःया व्यवसायलय् ल्यायम्ह पुस्तायात सालाकायेत युवा मन्त्रालयं ठोस योजना हयेगु प्रतिवद्धता प्वंकादिल ।

लुँ तस्कर काण्डय् ल्हाः दुगु खनेदुपिन्त ज्वनेगु न्ह्यायेधुंकूगु धासें मन्त्री श्रेष्ठं दोषी सुं नं बचे जुइकेमबीगु धयादिल ।

‘लुँ तस्कर सम्वन्धि अध्ययन अनुसन्धान यायेत नीवस्वंगु आयोगया प्रतिवेदन म्हिगः वयाःलि थुकियात अध्ययन यानाः कार्यान्वयनय् यंकेगु निर्णय म्हिगःया हे मन्त्रिपरिषद् मुँज्यां जुइधुंकल । लिसें म्हिगःनिसें हे थुकी ल्हाः दुगु खनेदुपिन्त ज्वनेगु ज्या नं न्ह्यायेधुंकल । निर्दोष ढुक्क जूसां ज्यू, दोषी स्वइतं नं त्वःतेगु जुइमखु’ मन्त्री श्रेष्ठया धापू खः ।

नेपाल सुनचाँदी व्यवसायी महासंघया नायः मणिकरत्न शाक्यं बजारय् दुपिं व्यापारी मसखें पिनेया तत्वं यानाः तस्करी जुयाच्वंगु धयादिल ।

नायः सुरेश शाक्यं थःगु स्वदँया कार्यकालय् थुगु संस्थाया गरिमा अझ थकायेत ज्या यानागु दावी यानादिल ।