वरिष्ठ फोटो पत्रकार राजभाई सुवालया अबु पंचरत्न महर्जन मन्त ।

स्ट्रोक जुइधुंकाः उसाँय् मदयाः थःगु याकाच्वनादीम्ह महर्जन वंगु बहनी मदुगु खः । बि एन्ड बि अस्पतालय् वासः यायेगु झ्वलय् बहनी ९ः४१ बजे वयकः मदुगु वयकःया माइलाम्ह काय् राजभाई सुवालं कनादिल ।

मदुम्ह महर्जनया अन्त्येष्टि थौं टेकुस्थित जम्बुदीप घाटय् जूगु दु । मदुम्ह महर्जनयात वयकःया तःधिकःम्ह काय् राजेन्द्र सुवालं मि तयादीगु खः ।

मदुम्ह महर्जनया तःधिकःम्ह काय् राजेन्द्र नं म्येहालामि खः ।

मदूम्ह महर्जनयात करीब लछि न्ह्यः स्ट्रोक जूगु खः ।

वंगु जेठ १२ गते वय्कःयात स्ट्रोक जुइधुंकाः वासः यायेत केएमसी अस्पताल यंकूगु खः । उगु अस्पतालय् छवाः वासः यानाःलि वयकः डिस्चार्ज जूगु खः ।

छेँय् हयेधुंकाः लिपा उसाँय् झन स्यनावंबलय् वय्कःयात वंगु असार १० गते हाकन अस्पताल यंकूगु खः । उगु दिनंनिसें वयकःयात भेन्टिलेटरय् तयाः वासः यानाच्वंगु खः ।

लिपा वय्कःयात १५ गते बहनी भेन्टिलेटरं लिकानां वासः यानाच्वंगु खःसा म्हिगः बहनी वय्कः मदुगु खः ।

मदुम्ह महर्जन थःगु इलयया नांजाःम्ह प्याखंम्वः खः । उगु इलय् वयकलं यक्व हे दबू प्याखंत म्हितादीगु दु ।

उगु इलय् वय्कलं अभिनय यानादीगु प्याखं ‘फ्वगिंया सर्बे’ तसकं तसकं ल्वकं ह्वाःगु खःसा वयकलं म्हितादीगु मेगु प्याखं ‘निपु  प्याखं’ उलि हे चर्चित जूगु खः ।

महर्जनया परिवारय् जहानलिसें स्वम्ह कायपिं दी । राजेन्द्र वय्कःया तःधिकःम्ह काय् व राजभाई माइलाम्ह काय खःसा चिधिकःम्ह काय् विजय सुवाल महर्जन खः ।