येँया ताम्सीपाखास्थित न्यू जेनिथ इङ्गलिस मोडल स्कूलं भव्य मेलाया रुपं ‘न्यू जेनिथ डे’या ग्वसाः ग्वइगु जूगु दु ।

न्यू जेनिथं थःगु २६क्वःगु स्थापना दिवसया लसताय् परम्परागत नसा ज्वलंलिसें थीथी स्टल अले सांगितिक ज्याझ्वःलिसें मेलाया ग्वसाः ग्वयेत्यंगु खः ।

स्कूल वइगु मंसीर २९ गते शनिबाःया दिनस स्कूल परिसरय् हे ज्याझ्वःया ग्वसाः ग्वयेत्यंगु खः ।

ताम्सीपाखा विष्णुमति लिंकरोडस्थित स्कूलय् आः न्यागू ब्लक न्ह्यानाच्वंगु दुसा स्कूलं उगु न्यागुलिं ब्लकय् थीथी ज्याझ्वः, ब्वज्या यायेत्यनागु न्यू जेनिथया प्रिन्सिपल राजु महर्जनं जानकारी बियादिल ।

‘न्यू जेनिथ डे’ कुन्हु ‘ब्लक ‘ए’ व ‘बि’लय् नसा ज्वलंलिसें थीथी हजंज्वलंया स्टल, सांगितिक ज्याझ्वःत जुइसा ब्लक ‘सी’लय् आर्ट ब्वज्या, ‘डी’ ब्लकय् ह्यान्ड राइटिङ ब्वज्या ‘ई’ ब्लकय् रोबोटिक्स ब्वज्या जुइ ।

‘आर्ट ब्वज्याय् थनया हे विद्यार्थीतयसं दयेकूगु बोटल आर्टलिसें थीथी आर्ट दइ । मचातयके थुलि बांलाःगु कलाकारिता दु खनी, अजूचायापुसेच्वं । न्यागू, खुगू आर्ट ला जिं हे न्यायेगु जुइधुंकल, अभिभावकतयसं नं मचातयत हःपाः बियादीत जिं इनाप याना’ प्रिन्सिपल महर्जनं धयादिल ।

स्थानीय नेवाः नसालिसें थीथी नसा ज्वलंया फुड स्टलया संयोजन उगु हे स्कूलय् होटल म्यानेजमेन्टया ११, १२ कक्षाया विद्यार्थीतयसं यायेत्यंगु दु ।

सांगितिक ज्याझ्वः अन्तर्गत सुथय् ११ताः इलंनिसें न्हिनय् १ताः ईतक स्कूलया हे विद्यार्थीलिसें शिक्षक शिक्षिकातय् न्ह्यब्वया दइसा १ताः इलंनिसें ४ताः ईतक स्कूलया हे विद्यार्थीतय् ब्यान्डलिसें सुरज एन्ड एलुरीज ब्यान्ड व समीर श्रेष्ठं सांगितिक न्ह्यब्वया न्ह्यब्वइ ।

विद्यार्थीतय् प्रतिभा पिब्वयेगुलिसें सर्वसाधारणयात स्कूलया भौतिक संरचना व सुविधाया जानकारी बीगु आज्जुं नं ज्याझ्वः यायेत्यनागु प्रिन्सिपल महर्जनं धयादिल ।

‘थन बियावयागु सुविधा व गुणस्तरीय शिक्षा थनया हे शुल्कय् मेथाय् गनं दइ हे मखु धइगु जिगु दावी हे खः । थुगु ज्याझ्वलं अभिभावकतयसं स्कूल व स्कूलया स्तरीयताबारे जानकारी कायेखनेमा धइगु नं आज्जु कयागु दु’ महर्जनया धापू खः ।

ज्याझ्वःया दिनय् न्यनेकने व विद्यार्थी नां दर्ताया नितिं अलग्ग हे डेस्क दइगु व सुयां थः मस्तय् भर्ना यायेगु खःसा उगु हे दिनय् नां दर्ता यायेफइगु धाःगु दु ।

मेलायात स्वद्वःनिसें न्याद्वःम्हेसिनं अवलोकन याइगु अपेक्षा स्कूलया दु । मेलाय् दुतिनाया नितिं १०तकाया टिकटया व्यवस्था यानागु नं स्कूलं धाःगु दु ।

न्यू जेनिथ इङ्गलिस मोडल स्कूलया स्थापना वि.सं. २०५७ सालय् जूगु खः ।

आः स्कूलय् न्यागू ब्लक न्ह्याकावःगु दु, गुकी साढे २ करोडया लगानीइ ‘ब्लक ई’ दयेकाः संचालनय् हःगु दु । ई ब्लकय् बास्केटबल कोर्टलिसें फुटसल कोर्ट नं दयेकूगु दु ।

इनडोर गेमया लागिं ‘सी’ ब्लकय् माःगु पूर्वाधार तयार जुइधुंकूगु दुसा थन याकनं हे चेस, ब्याडमिन्टन, टेनिसलिसेंया इनडोर कासात न्ह्याकेगु तयारी स्कूलया दु ।