यलय् म्युजिक भिडियो निर्माण कार्यशाला क्वचाःगु दु । यल महानगरपालिका वडा १६ या कलाकार समितिया ग्वसालय् यलया जावलाख्यलय् उगु कार्यशाला जूगु खः ।

म्यूजिक भिडियो ख्यलय् नेपाः दुने दकले न्हापांगु दावी याःगु थुगु कार्यशालाय् थ्यंमथ्यं स्वीम्ह म्युजिक भिडियोकःमितयसं ब्वति काःगु खः ।

ज्याझ्वलय् कलाकार समितिया कजि सुरजबीर बज्राचार्यं शहरया भौतिक संरचनाया संरक्षणयालिसें सामाजिक व सांस्कृतिक विकास यलया १६ वडाया मू आज्जु खःगु धयादिल ।

थौंकन्हय् नेपालभाषाया संगीत ख्यलय् म्युजिक भिडियोया तःधंगु ल्हाः दयाच्वंगुलि थ्व ख्यःयाबारे खँ ल्ह्वनेत कार्यशाला गोष्ठीया ग्वसाः ग्वयागु धयादिल ।

कार्यशालाया कजि संगीतकःमि नील शाक्यं कलाकार समितिपाखें नेवाः संगीत ख्यःया सम्बर्द्धनया निंतिं सक्रिय जुयाच्वनागु धयादिल ।

कार्यशालाया श्रोत व्यक्ति दकले न्हापांम्ह नेपालभाषा म्युजिक भिडियो निर्देशक विजयरत्न असंबरें संसारय् म्युजिक भिडियोया स्थिति व नेपालभाषाया संगीत ख्यलय् म्युजिक भिडियोया थाययाबारे खँ तयादिल ।

मेम्ह श्रोत व्यक्ति नांजाःम्ह सिनेमाटोग्राफर सिद्धार्थ शाक्यं म्युजिक भिडियोया क्यामेरा पक्षया खँ तयादिल सा नांजाःम्ह फिल्म एडिटर माणिकरत्न तुलाधरं म्युजिक भिडियोया सम्पादन पक्षयात कयाः जानकारी बियादिल ।