Apexcoder  tech

जनहित महिला समूहया उद्घोषण तालिम क्वचाल

eBukhan – ईबुखँ डेस्क,    २०८१ माघ १६, बुधबार    वर्गीकृत समाज

यल यंगुबहालया जनहित महिला समूहया उद्घोषण तालिम क्वचाःगु दु ।

यल महानगरपालिका ८ वडाया ग्वहालिइ समूहं याःगु ७न्हुया तालीम दसिपौ लःल्हायेगु ज्याझ्वः यासें क्वचाःगु खः ।

तालिमया समापन समारोहस यल महानगरपालिका वडा ८ या नायः बाबुरत्न महर्जनं तालिमया ब्वतिमितयत दसिपौ लःल्हानादिल ।

नुगःखँ तयेगु झ्वलय् वडानायः महर्जनं न्हयन्हुया तालिमं ब्वतिमितयगु न्वचु कला, ज्याझ्वः न्ह्याकेगु कलानापं ब्यवस्थापनय् खनेदुगु ह्यूपालं थः अतिकं प्रभावित जूगु धयादिल ।

तालिमया प्रशिक्षक सुरजवीर बज्राचार्यं प्रशिक्षण न्हयन्हुयागु खःसां जीवनय् गुबले नं मालीबलय् थम्हं ग्वहालि यायेगु प्रतिवद्धता प्वंकादिल ।

ज्याझ्वलय् यल मपा वडा ८ या महिला सदस्य लक्ष्मी महर्जन, सदस्य विमला महर्जन, बाराही समाजया नायः चन्द्रमान बाराही, यंगुबहाल युवा क्लबया ल्यूदांभरी अनिल बाराही, समूहया निवर्तमान नायः रमिता महर्जनया उपस्थिती दुगु खः ।

ज्याझ्वलय् समूहया न्वकू पूर्णशोभा महर्जनलिसें तालिमया ब्वतिमि काजीबाबु महर्जन, रुपक बाराही, विणा चित्रकारलिसें नं थःथःगु अनुभव खँ तयादीगु खः ।