यल महानगरपालिका १६ वडाया व्यवस्थापनय् आः याकनं हे रात्रीकालिन बजाः चायेकेगु तयारी जुयाच्वंगु यल महानगरपालिका १६ वडाया वडाध्यक्ष निर्मलरत्न शाक्यं कनादीगु दु ।

चान्हय् नं थःत यःगु व थयात माःगु सामान न्यायेमी दइ कथं रात्रीकालिन बजाः चायेकेगु तयारी जुयाच्वंगु वडाध्यक्ष शाक्यं धयादिल ।

यल मपा १६ वडाया ग्वसालय् ६०न्हुयंकया बुटिक कोर्ष ट्रेनिङया समापन ज्याझ्वलय् शाक्यं रात्रीकालिन बजाःया योजनाया खँ सार्वजनिक यानादीगु खः ।

यल मपा १६ वडां मिस्तयत आत्मनिर्भर व स्वरोजगार दयेकेगु आज्जुलिसें गर्जियस फेशन टेक्नोलोजि इन्स्टिच्युट (गिफ्ट) पाखें न्हकूगु तालीम सोमबाः क्वचाःगु खः ।

गिफ्टया प्रोप्राइटर लिसें कलाकार शोभा महर्जनं प्रशिक्षण ब्यूगु ज्याझ्वलय् यल मपा १६ वडाया २०म्ह मिसातय् ब्वति दुगु खः ।

समापन ज्याझ्वलय् प्रशिक्षार्थीपाखें विणा शाक्य, सुनयना शाक्य व त्रिशला राजभण्डारीं थज्याःगु तालिमं शिप विकास जूगु जक मखसें आत्मविश्वास नं थहांवःगु धयादिल ।

ज्याझ्वलय् वरिष्ठ सिने पत्रकार निर्देशक विजयरत्न असंबरें यलय् वडा १६ लगायत मेमेगु वडां जुया च्वंगु भौतिक विकासया नापं सामाजिक, सांस्कृतिक विकासया ज्यां रोजगारमुलक ज्याय् तिबः बियाच्वंगु धयादिल ।

अथेहे बुटिक एशोसियसनया संस्थापक अध्यक्ष उज्ज्वल कृष्ण श्रेष्ठं बुटिक फेशनया शिप धइगु जीवनय् सदां ज्या वइगु धयादिल ।

ज्याझ्वलय् वडा १६ या मिसा दुजः लिसें मिसा उप समितिया कजि बबिता श्रेष्ठं मिस्त आः न्हापा थें छेँज्याय् जक लिकुनाच्वनीपिं मखसें सामाजिक व पारिवारिक समृद्धिया ज्याय् धिसिलागु पलाः ल्ह्वनीपिं जुइधुंकूगु धयादिल ।

गिफ्टया प्रोप्राइटर शोभा महर्जनं थौंकन्हय् मिस्त फेशन बुटिक शिप सयेकेगु ज्याय् न्ह्याःवयाच्वंगु बांलागु पक्ष खःगु धयादिल ।

ज्याझ्वलय् नेवाः संकिपा ख्यःया लोकंह्वाःपिं हिरोइनत भिन्तुना जोशी व रेश्मी महर्जनया नं उपस्थिति दूगु खः ।