काठमाडौं दरवार स्क्वाएर पर्यटन प्रबर्ध्दन संघया न्हूधाः जूगु दु ।

संघया दक्षिणकालीइ क्वचाःगु दँमुँज्यां दिनेश सुवालया अध्यक्षताय् १० दुजःया ज्यासना पुचः निर्विरोध निर्वाचित याःगु दु।

सर्वसम्मत चयन जूगु संघया न्हूगु ज्यासना पुचःया न्वकू पदय् किरण बहादुर श्रेष्ठ ल्यःगु दुसा मूछ्यान्जेया भाला पुरुषोत्तम डंगोलयात ब्यूगु दु ।

छ्यान्जेय् रन्जन लाल श्रेष्ठ व दांभरिं पदय् संजयमान श्रेष्ठ चयन जुल । अथेहे, दिपक मर्हजन, सुरेश प्रसाद श्रेष्ठ, बसन्त श्रेष्ठ व बाल कृष्ण महर्जनयात दुजः ल्यःगु दु ।

न्हूगु ज्यासना पुचःया पदाधिकारी व दुजःतयत संस्थाया सल्लाहकार तकं खःम्ह बागमति प्रदेश सभासद् लिसें पूर्वमन्त्री शैलेन्द्रमान बज्राचार्यं खादा न्ययेकादिल सा अधिवक्ता ऋषिराम न्यौपानें दसिपौ लःल्हानादिल ।

उगु इलय् न्हूगु ज्यासना पुचःयात भिंतुना देछासें सभासद् बज्राचार्यं स्थानीय संस्कृति सम्पदायात आर्थिक पक्षलिसे नं स्वाकाः स्थानीयया जीवनस्तर थकायेगु नितिं ल्यायम्ह पुस्ता न्ह्यज्यायेमाःवुलिइ बः बियादीगु खः ।