नेपाली कांग्रेस व माओवादी नेतृत्वया सत्ता गठबन्धन क्वदःगुलिसें न्हूगु मन्त्रीमण्डलया लागिं गृहकार्य न्ह्याःगु दु ।

प्रधानमन्त्री पुष्पकमल दाहालं सोमबाः हे सरकारय् एमालेयात दुथ्याकाः चीधंगु आकारको मन्त्रीपरिषद् पुनर्गठन यानादीत्यंगु सीदुगु दु । गुकिया अन्तर्गत सनिलय्तक नवनियुक्त मन्त्रीतय् शपथ ग्रहणया लागिं राष्ट्रपति रामचन्द्र पौडेलयाके ई फ्वंगु जानकारी वःगु दु ।

प्रधानमन्त्री प्रचण्डं राष्ट्रपतियात नापलानाः मन्त्रीपरिषद् पुनर्गठन यायेगु व स्वम्ह दुजःया विना विभागीय मन्त्रीतय् नियुक्ति याइगु धाःगु दु ।

सोमबाः सुथय् प्रधानमन्त्रीें प्रमुख प्रतिपक्षी दल नेकपा (एमाले) नायः केपी शर्मा ओलीलिसेंया शीर्ष नेतातलिसे बालुवाटारय् सहलह यानादीगु खः । सहलह लिसें न्हूगु राजनीतिक गठबन्धन निर्माण व पुलांगु गठबन्धन क्वदलीगु छुमा खनेदुगु खः ।

थौं माओवादी केन्द्रं हितबहादुर तामाङ, नेकपा (एमाले) पाखें पदम गिरी व राष्ट्रिय स्वतन्त्र पार्टी (रास्वपा) पाखें डोलप्रसाद (डिपी) अर्यालं विना विभागीय मन्त्रीया पद अले गोपनीयताया शपथ नयादीगु धाःगु दु ।

मेपिं मन्त्री व जिम्मवारी बारे क्वःछीत सत्ता गठबन्धनं प्यम्ह दुजःया कार्यदल दयेकूगु दु । व कार्यदलय् नेतात एमालें विष्णुप्रसाद पौडेल, माओवादी केन्द्रं वर्षमान पुन, रास्वपां रवि लामिछाने व राजपा नेपालं उपेन्द्र यादव दु ।

स्रोतया कथं वंगु चान्हय् लिबाक्क तक जूगु मुँज्याय् जूगु सहमति कथं माओवादी केन्द्रं नेपाली कांग्रेसलिसेया सहकार्य त्वाःथलेगु निर्णय याःगु खः ।

एमालेलिसेंया पुलांगु हे गठबन्धन लितहयेगु सहमति जुइधुंकाः थौं सुथंनिसें हे माओवादी, एमाले, रास्वपा व जसपा आन्तरिक तयारीइ जाःगु खः । थुखे, न्हूगु सत्ता गठबन्धनया दलतय् दथुइ मन्त्रालय भागबन्डा क्वःछीत सोमबाः न्हिनय् मुँज्या च्वंगु खः ।

प्रधानमन्त्री पुष्पकमल दाहाल प्रचण्डं मन्त्रालय भागबन्डा क्वःछीत गठबन्धनय् दुथ्याःपिं दल नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी व जनता समाजवादी पार्टीया शीर्ष नेतातयत थःगु सरकारी निवास बालुवाटारय् सःतादीगु खः ।