वागमती प्रदेश सभा अन्तर्गतया उद्योग पर्यटन तथा वातावरण समितिया दुजःतयसं येँया वसन्तपुर क्षेत्र भ्रमण याःगु दु ।

वंगु शुक्रबाः प्रदेश सभा अन्तर्गतया समितिया दुजःतयसं येँया वसन्तपुरय् कुमारीया दर्शन यानाः कुमारीया हे ल्हातं सिन्हः तीगुलिसें उगु क्षेत्रया अवलोकन भ्रमण याःगु खः । समितिया दुजःतयसं येँया वसन्तपुरया कुमारी छेँ, श्रीखण्ड तरुमूल महाविहार, मरुसतः, पुनर्निर्माणया अवस्थाय् दुगु महाःद्यः पार्वती देगः, हनुमानध्वाखाया अवलोकन याःगु खः ।

व झ्वलय् समितिया सभापति याङकिला शेर्पां येँया स्थानीय संस्कृति, सम्पदा हलिमय् हे ज्वः मदुगु धयादिल  ।

‘स्वनिगःया अनुपम, अद्वितीय सम्पदा संस्कृतिं हे नेपालयात हलिंया न्ह्यःने म्हसीकूगु दु । थुकिया संरक्षण, सम्वर्ध्दन व प्रवर्ध्दनय् प्रदेश सरकारं फक्व पहल व ग्वहालि याइ’ पूर्व संघीय सभासद व पूर्वमन्त्री तकं खःम्ह सभापति शेर्पां धयादिल ।

भ्रमण ज्याझ्वः वागमती प्रदेश सभासद् शैलेन्द्र बज्राचार्यया पहलय् जूगु खः । थनया स्थानीय सम्पदा, संस्कृति व थ्वलिसे स्वानाच्वंगु पर्यटन उद्योगया सम्भाव्यताया बारे जानकारी बीत ज्याझ्वःया ग्वसाः ग्वयागु सभासद् बज्राचार्यं धयादिल ।

‘थनया स्थानीय संस्कृति सम्पदा नेपालया म्हसीका जक मखु, स्थानीय वासिन्दाया जीवनस्तरयात हे थकायेगु माध्यम नं खः । थ्वबारे सभासद्त सचेत जुइमा व प्रदेश सभाय् हे थ्व विषय दुहांवनाः योजना दयेकेमा धकाः थ्व ज्याझ्वः यानागु खः’ सभासद् बज्राचार्यं धयादिल ।

समितिया सभापति, दुजःलिसें करीब १४ प्रदेश सभासद्तयसं वसन्तपुर क्षेत्रया अवलोकन याःगु खः । व झ्वलय् नेवाः देय् दबूया नायः पवित्र बज्राचार्य, स्थानीय संघसंस्थाया प्रतिनिधिपिं व स्थानीय संचारकर्मीतय् नं ब्वति दुगु खः ।