दोलखाया बुंगद्यःया रथयात्राया झ्वलय् थौं रथ क्वदःगु दु ।

रथयात्राया थौं निन्हुगु दिनय् रथ सालाच्वंबलय् नक्छेँ धइगु थासय् थ्यंबलय् रथ क्वदःगु खः । रथ सालाच्वँच्वं मोडय् थ्यंबलय् रथ क्वदःवंगु खः ।

थुकथं रथ क्वदःगुयात गुलिसिनं मभिंगु छुमा व थुकिं देशय् छुं मभिंगु जुइगु विश्लेषण याःगु दु ।

गुलिसिनं धाःसा जात्राया जोशय् होश तंगुया लिच्वः कथं जूगु दुर्घटना व थुकियात सामान्य रुपं कायेमाःगु धयाच्वंगु दु ।

दोलखाया स्थानीय वासिन्दातय् कथं रथ क्वदःबलय् रथया दथुइया छुं ब्व स्यंगु दु । रथया मर्मत कन्हय् याइगु धाःगु दु ।

रथ क्वदलेधुंकाः स्थानीय वासिन्दा जानाः रथ थनाः थौंया रथयात्रा क्वचायेकूगु दु । थौंया ज्याझ्वः कथं क्वदःगु रथयात थनाः श्यामसुन्दर त्चालय् थ्यंकाः याः न्यायेकूगु खः ।

जात्राया झ्वलय् कन्हय् रथ टसिचा त्वालय् यंकीसा कंस सेँगय् रथ साली ।

सेँगय् त्वाथः दुगु पाःचाय् ६० डिग्रिइ रथ च्वय् सालायंकी । रथयात्राया थ्व अवसरयात जात्राया विशेष आकर्षणया रुपं काइ ।