इलाम व बझाङय् उपनिर्वाचनया झ्वलय् आः मतदान जुयाच्वंगु दु ।

इलाम–२ लय् प्रतिनिधिसभा सदस्यया लागिं व बझाङ–१ ‘क’य् प्रदेश सभा सदस्यया लागिं मतदान जुयाच्वंगु खः ।

निथासं नं सुथय् ७ताः इलंनिसें न्ह्याःगु मतदान सनिलया ५ताः ईतक जुइगु निर्वाचन आयोगं धाःगु दु ।

इलामय् उम्मेदवारतयसं थःथःगु मतदान यायेधुंकूगु दु ।

इलामय् नेपाली कांग्रेसया उम्मेदवार डम्बर खड्कां महेन्द्र रत्न बहुमुखी क्याम्पसया ‘क’ केन्द्रं मतदान याःगु दुसा एमाले उम्मेदवार सुहाङ नेम्वाङं महेन्द्ररत्न बहुमुखी क्याम्पसया ‘ग’ केन्द्रं मतदान यात ।

राष्ट्रिय स्वतन्त्र पार्टीका उम्मेदवार मिलन लिम्बुं माङसेबुङ–२ दहगाउँस्थित जनता कल्याण आधारभुत विद्यालयया ‘ख’ केन्द्रं मतदान यानादिल ।

स्वतन्त्र उम्मेदवार डकेन्द्रसिंह थेगिमं फाकफोकथुम गाउँपालिका–३ स्थित सिंहदेबी मा.बि. शुक्रबारे (क) मतदान केन्द्रय् मतदान यानादिल ।

आयोगया कथं इलाम–२ स छगू लख १६द्वः, ८८९ मतदाता दुसा ७९ मतदानस्थलय् १४९ मतदान केन्द्रं मतदान जुयाच्वंगु दु ।

एमाले सांसद सुवास नेम्वाङ मदयधुंकाः उपनिर्वाचन जुइत्यंगु इलाम–२स थीथी राजनीतिक दल व स्वतन्त्र यानाः १९ उम्मेदवार चुनावी मैदानय् दु ।

प्रदेश सभा निर्वाचन क्षेत्र–१ (क) या उपनिर्वाचनया झ्वलय् ७४ मतदानस्थलया ९४ मतदान केन्द्रय् शान्तिपूर्ण रूपं मतदान जुयाच्वंगु दु । थन ६१द्वः, ७४८ मतदाता दु ।

बझाङ १ ‘क’य् प्रदेश सभा सदस्य पृथ्वीबहादुर सिंह मदयधुंकाः जुयाच्वंगु उपनिर्वाचनय् १२ उम्मेदवार चुनावी धेंधें बल्लाखय् दु ।