मैंचा, राजमतिचालिसेंया नेपालभाषाया म्ये हालाः नांजाःम्ह म्योहलामि उजं शाक्यया न्हूगु म्ये सार्वजनिक जूगु दु । नेपाल सम्वत ११४५ न्हूदँया लसताय् उजं शाक्यं थःगु न्हूगु म्ये ‘लुमन्ति’ सार्वजनिक यानादीगु खः ।

वंगु बुधबाः येँय् जूगु छगू ज्याझ्वलय् उगु म्येया म्यूजिक भिडियो प्रिमियर याःगु खः ।

ज्याझ्वलय् म्येहालामि शाक्यं लुमन्ति म्ये हालाः नं न्यंकादीगु खः ।

न्हूगु म्ये लुमन्ति म्ये व म्यूजिक भिडियोयात थःगु न्हापाया म्ये अले म्यूजिक भिडियो स्वयां बिस्कं दयेकेगु कुतः थम्हं यानागु शाक्यं धयादिल ।

‘मैंचा, राजमतिचा व लिक्क लिक्कयात सकसिनं तसकं ययेकादिल, उकिया नितिं सकसित सुभाय् ला धाये हे माः । थुगु म्ये लुमन्तियात न्हापाया म्ये स्वयां बिस्कं दयेकेत स्वयागु दु’ शाक्यं धयादिल ।

म्यूजिक भिडियोलय् छम्ह मतिनामि मिजंया ल्यायम्ह ईया मतिना व मतिनामिया लुमन्ति क्यनातःगु दु ।

म्यूजिक भिडियोया बाखं व परिकल्पनालिसें म्येग्वः व लय् नं म्येहालामि शाक्यया हे खः ।

निर्देशनलिसें छायाङ्कन व दृश्य सम्पादन रपिल महर्जनं यानादीगु दु । कोरीयोग्राफी सुनिता सिजाली मगरं यानादीगु दु ।

म्येय् मुख्य कलाकारया रुपं इभा शाही, नेवाः कला ख्यःया सुपरस्टार हिरो रुपेन्द्र श्रेष्ठलिसें म्येहालामि उजं थम्हं हे नं अभिनय यानादीगु दु ।

वंगु बुधबाः हे उजं शाक्ययागु हे युट्युब च्यानलय् थुगु म्ये सार्वजनिक जुइधुंकूगु दु ।

शनिबा न्हूदँया दिनय् चान्हसिया ११ताः ईतकया दुने थुगु म्येया भ्यूज ७५द्वः स्वयां अप्वः थ्यनेधुंकूगु दु ।