थुगुसीया २५६८क्वःगु बुद्ध जयन्ती यलय् यल मनपा वडा नं. ११ इखाछेँ त्वालय् तःजिक न्यायेकीगु जूगु दु ।

२५६८क्वःगु बुद्ध जयन्ती समारोह समितिं यलय् छगू पत्रकार सम्मेलन यासें थुगु जानकारी ब्यूगु खः ।

पत्रकार सम्मेलनय् समारोह समितिया नायः यज्ञमान शाक्यं भगवान बुद्धया जन्म, बोधिज्ञान लाभ व महापरिनिर्वाण स्वंगुलि घटनाया महत्व उलेगु कथं थुगुसीया बुद्ध जयन्ती हनेगु धयादिल ।

‘स्वांया पुन्हिकुन्हु तथागत भगवान बुद्धया जन्म, बोधि ज्ञान प्राप्त जूगु व महापरिनिर्वाण जूगु त्रिसंयोग चूलाःगु दिन खः । वहे प्रतीकसहित थुगुसी शोभा यात्रा यायेगु ग्वसाः दु’ समारोह समितिया नायः शाक्यं धयादिल ।

बुद्ध जयन्ती समारोहयात ताःलाकेगु नितिं थीथी २२ उपसिमित नं नीस्वंगु जानकारी नं पत्रकार सम्मेलनय् ब्यूगु खः ।

ज्याझ्वलय् ललितपुर बुद्ध जयन्ती कोषया नायः चन्द्रमान शाक्य, यल वडा ११ या वडाध्यक्ष अरोजकुमार खडगी, नेवाः पत्रकार राष्ट्रिय दबूया केन्द्रिय न्वकू सुनिल महर्जन लगायतं थीथी खँया जानकारी ब्युसें थःथःगु खँ तयादीगु खः ।