किपूया बाघ भैरव देगलय् स्वर्ण शक्ति भैरवया मूर्ति स्थापना याःगु दु । यलया ल्हामो ह्याण्डीक्राफ्टं दयेकूगु उगु मूर्ति किपूया बाघ भैरव देगलय् स्थापना याःगु खः ।

शुक्रबाः यलय् छगू ज्याझ्वः यासें बाघ भैरव स्वर्ण शक्ति भैरवया उगु मूर्ति लःल्हाःगु खः ।

उगु हे ज्याझ्वलय् मूर्ति दयेकेत ग्वहालि याःपिं कालिगढ व उमि छेँजःपिन्त नं सम्मान याःगु खः ।

३ फिट तःधिकःगु उगु मूर्ति करिब २० कालिगढं दछि बिकाः दयेकूगु खः ।

किपुलिइ दँयदसं भाद्रया संल्हू अर्थात १ गतेया दिनय् बाघभैरवया जात्रा याइ । थुगुसी जात्राया छन्हु न्ह्यः बाघभैरव स्वर्ण शक्ति भैरवया मूर्ति यलं यंकाः देगलय् प्रतिस्थापन याःगु खः ।

किपूया गुँदेय् दापा खलःया करीब २५०म्हेसिया पुचलं यलया लुँखुसिं बाजंगाजंलिसें भैरवया मूर्ति खतय् कुबियाः यलया थीथी थासय् चाःहिकाः किपुलिइ थ्यंकाः बाघभैरव देगलय् स्थापना याःगु खः ।

क्रोधकला शिरोमणि कालु कुमालेया मदुम्ह काय वीरेन्द्रकुमार अवालेया लुमन्तिइ ल्हामो ह्याण्डीक्राफ्टं उगु मूर्ति दयेकूगु खः ।

किपुलिइ बाघभैरवयात दुष्ट आत्मा व विपत्तिं रक्षा याइम्ह द्यःया रुपं काइ । किपुलिइ बाघभैरवयात धुम्बाः आजु वा धुँबहाः आजु धायेगु याः ।

जुजु शिवदेव तृतीयं थनिं करिब द्वःछि दँ न्ह्यः बाघ भैरव देगः दयेकूगु धयातःगु दु ।