वांङ्गमय शताब्दि पुरूष डा. सत्यमोहन जोशीया १०५दँया बुदिंया झ्वलय् खुगू सफू छक्वलं पितब्वज्या जूगु दु ।

लोक साहित्य परिषदया ग्वसालय् छवाःयंक थीथी ज्याझ्वः यानावःगु झ्वलय् थौं आइतबार समापन समाराेह यासें उगु हे समाराेहस खुगू सफूया पितब्वज्या जूगु खः ।

थौं शताब्दि पुरुषया छेँ सत्यमोहन लोक साहित्य भवन परिसरय् जूगु समापन समारोहस बागमति प्रदेशया संस्कृति, पर्यटन व सहकारी मन्त्री शैलेन्द्रमान बज्राचार्यं खुगू सफूया पितव्वज्या यानादिल ।

ज्याझ्वलय् मल्ल के. सुन्दरया ‘लुमन्तिया किचः’, बिजयरत्न असंबरेया ‘संकिपाया न्हायकं’, कृष्णप्यारी श्रेष्ठया ‘बोदेया नीलबाराही द्यःगं नकेगु परम्परा’ सफूया पितब्वज्या जूगु खः ।

नापं ईश्वरी मैयाँ श्रेष्ठया ‘नेपालभाषाया पद्यया किचः’, धर्मकृष्ण श्रेष्ठया ‘थिमिया स्यस्यः बिनां’ सफूयानापं लोक साहित्य परिषदं पिथंगु अणुराज जोशीया ‘महाकाव्य ख्यः व शताब्दि अभिनन्दन’ सफू नं पितब्वज्या याःगु खः ।

नुगःखँ तयेगु झ्वलय् मन्त्री बज्राचार्यं राजनीति धइगु राज्यया नीतिलिसे स्वापु दूगु खँग्वः खःगु धासे राजनीतिप्रति आम नेवालं नं च्यूताः तयेमाःगु धयादिल ।

राज्यं देयया लोक साहित्य व संस्कृतिलिसे स्वापु दूगु नीति नं दयेकातःगु दुगु जानकारी ब्युसें मन्त्री बज्राचार्यं वहे नीतिया लिधंसाय् लोक साहित्य व संस्कृतिया थपु जुइगु ज्याय् थम्हं फक्व ग्वहालि यायेगु बचं बियादिल ।

परिषदया नायः राजित बहादुर श्रेष्ठं शताब्दी पुरुष जोशीं न्ह्याकादीगु लोक साहित्यया अध्ययन अनुसन्धानयात अझ तब्याका यंकेत परिषदं फक्व ज्या यायेगु प्रतिवध्दता प्वंकादिल ।

उगु हे ज्याझ्वलय् नेपाल व चीनया निगुलिं मोहदां सगरमाथा आरोहण यानाः कीर्तिमान तयादीम्ह कल्पना महर्जनयात सगरमाथाया च्वकाय् शताब्दि पुरुषया किपा थ्यंकूगु धासें हंगु नं खः ।